گوگل نیوز پر ہمیں فالو کریںپنجاب کے ضلع ملتان کے تاریخی شہر شجاع آباد میں درخت سے ایک نوجوان کی پھندا لگی لاش برآمد ہوئی ہے، جس کے باعث متأثرہ علاقے میں خوف و ہراس پھیل گیا۔
تفصیلات کے مطابق شجاع آباد کے علاقے چک سردار پور میں ایک نوجوان کی درخت سے لٹکتی ہوئی پھندا لگی لاش برآمد ہوئی۔ واقعے کی اطلاع ملنے پر علاقے میں تشویش پھیل گئی، جبکہ پولیس نے موقع پر پہنچ کر صورتحال کا جائزہ لیا اور ضروری کارروائی شروع کردی۔
ملتان پولیس کے مطابق اطلاع ملتے ہی بھاری نفری اور امدادی ٹیمیں جائے وقوعہ پر پہنچ گئیں۔ درخت سے ملنے والی لاش کی شناخت 26 سالہ رشید کے نام سے ہوئی ہے، جسے ضروری قانونی کارروائی کے بعد پوسٹ مارٹم کے لیے تحصیل ہیڈکوارٹر اسپتال منتقل کردیا گیا ہے۔
پولیس حکام کا کہنا ہے کہ تھانہ راجہ رام کی پولیس نے واقعے کی باقاعدہ تحقیقات کا آغاز کردیا ہے۔ حکام کے مطابق نوجوان کی موت کی اصل وجہ اور واقعے سے متعلق دیگر حقائق پوسٹ مارٹم رپورٹ سامنے آنے کے بعد ہی واضح ہوسکیں گے، جس کے بعد مزید کارروائی کی جائے گی۔
