گوگل نیوز پر ہمیں فالو کریںسیکیورٹی فورسز نے شمالی وزیرستان کے قریب پاک افغان بارڈر پر دہشت گردی کی ایک بڑی کوشش کو خاک میں ملاتے ہوئے 15 خوارج کو جہنم واصل کر دیا ہے۔ عسکری ذرائع کے مطابق یہ کارروائی 31 اگست اور یکم ستمبر کی درمیانی شب کی گئی، جب سرحد پار سے خوارج کے ایک مسلح گروہ کی مشکوک نقل و حرکت کو وقت پر ٹریک کر لیا گیا۔
پاک فوج کے شعبہ تعلقات عامہ (آئی ایس پی آر) کے مطابق، یہ آپریشن تقریباً 36 گھنٹے تک تسلسل کے ساتھ جاری رہا۔ اس دوران فورسز نے انتہائی پیشہ ورانہ حکمت عملی کا مظاہرہ کرتے ہوئے دشمن کے ناپاک عزائم کو خاک میں ملا دیا۔
آپریشن کے بعد کیے جانے والے کلیئرنس آپریشن میں ہلاک ہونے والے دہشت گردوں کے قبضے سے جدید خودکار اسلحہ اور گولہ بارود کی بڑی کھیپ بھی برآمد کی گئی ہے۔
افغان حکومت کی ذمہ داری اور عزمِ استحکام
ترجمان پاک فوج نے اس موقع پر دوٹوک الفاظ میں کہا کہ افغان طالبان عبوری حکومت بار بار کی یاددہانی کے باوجود دہشتگردوں کو اپنی سرزمین پاکستان کے خلاف استعمال کرنے سے روکنے میں ناکام رہی ہے۔ افغان انتظامیہ کی جانب سے مؤثر سرحدی انتظام اور عالمی ذمہ داریوں کی انجام دہی میں غفلت بدستور المیہ بنی ہوئی ہے۔
آئی ایس پی آر کا یہ بھی کہنا ہے کہ عزمِ استحکام وژن کے تحت ملک سے بیرونی سرپرستی میں پلنے والی دہشت گردی کا جڑ سے خاتمہ کرنے تک یہ کارروائیاں بلا تعطل جاری رہیں گی۔ اس وقت بھی علاقے میں موجود کسی بھی باقی ماندہ خطرے کے تدارک کے لیے کلیئرنس آپریشنز کا سلسلہ جاری ہے۔
وزیراعظم شہباز شریف کا خراج تحسین
دریں اثنا، وزیراعظم محمد شہباز شریف نے پاک افغان سرحد پر بروقت اور جرأت مندانہ کارروائی کرتے ہوئے دراندازی کی کوشش ناکام بنانے پر سیکیورٹی فورسز کے افسران اور جوانوں کو شاندار الفاظ میں خراج تحسین پیش کیا ہے۔ وزیراعظم نے اپنے بیان میں کہا کہ ہماری بہادر فورسز نے پیشہ ورانہ مہارت کی بہترین مثال قائم کرتے ہوئے ملک دشمن عناصر کے تمام عزائم ناکام بنا دیے ہیں اور پوری قوم کو اپنی مسلح افواج کی شجاعت پر فخر ہے۔
