گوگل نیوز پر ہمیں فالو کریںحکومت سندھ نے صوبے بھر کی سرکاری ڈسپنسریوں کے انتظامی ڈھانچے میں بڑی تبدیلی کرتے ہوئے ان کے انتظامی امور ایک سرکاری فنڈڈ غیر سرکاری ادارے (NGO) کے سپرد کرنے کا فیصلہ کر لیا ہے۔ اس حوالے سے محکمہ صحت سندھ نے تمام ضلعی ہیلتھ افسران (ڈی ایچ اوز) کو باضابطہ مراسلہ جاری کر دیا ہے۔
محکمہ صحت سندھ کے جاری کردہ مراسلے کے مطابق نئے انتظامی نظام کے تحت سرکاری ڈسپنسریوں کے روزمرہ انتظام، آپریشنل معاملات، عملے کی نگرانی اور دیگر انتظامی ذمہ داریاں متعلقہ سرکاری فنڈڈ غیر سرکاری ادارہ انجام دے گا، جبکہ محکمہ صحت نگرانی اور پالیسی امور پر توجہ دے گا۔
مراسلے میں بتایا گیا ہے کہ اس تبدیلی کے بعد ضلعی ہیلتھ افسران (DHOs) کا کردار بنیادی طور پر پولیو مہم، حفاظتی ٹیکہ جات (EPI) اور دیگر انسدادی صحت پروگراموں تک محدود رہے گا۔
حکومت سندھ کا مؤقف ہے کہ اس اقدام کا مقصد بنیادی صحت کے مراکز میں انتظامی نظام کو مزید مؤثر بنانا، عوام کو بہتر طبی سہولیات فراہم کرنا اور صحت کے شعبے کی کارکردگی میں بہتری لانا ہے۔
تاہم اس فیصلے پر مختلف حلقوں کی جانب سے ردعمل سامنے آنے کا امکان ہے، جبکہ ماہرین صحت کا کہنا ہے کہ نئے نظام کی کامیابی کا انحصار شفاف عملدرآمد، مؤثر نگرانی اور عوام کو فراہم کی جانے والی طبی سہولیات کے معیار پر ہوگا۔
