گوگل نیوز پر ہمیں فالو کریںراولپنڈی کے علاقے دھمیال میں دھوکہ دہی کا ایک حیران کن واقعہ سامنے آیا ہے، جہاں پولیس نے زیادتی کے سنگین الزام کو من گھڑت طور پر گھڑنے کے الزام میں ایک مرد اور ایک خاتون کے خلاف مقدمہ درج کر لیا۔
تفصیلات کے مطابق پولیس کو ہنگامی ہیلپ لائن 15 پر اطلاع موصول ہوئی کہ بنی اسٹاپ پر جنسی زیادتی کا واقعہ پیش آیا ہے۔ اطلاع بائیکیا رائیڈر وقار خان نے دی، تاہم جب اسسٹنٹ سب انسپکٹر رضوان اعوان موقع پر پہنچے تو وقار خان وہاں موجود نہیں تھا اور اس کا موبائل فون بھی بند تھا۔
پولیس کو موقع پر ایک خاتون ملی جس نے اپنا نام شبانہ کوثر بتایا۔ خاتون نے الزام عائد کیا کہ شاہد نامی ایک مقامی شخص نے مالی مدد کی درخواست پر اسے اپنے گھر بلایا، پستول کے زور پر دھمکایا اور اس کے ساتھ زیادتی کی۔
خاتون کے بیان کو انتہائی مشکوک قرار دیتے ہوئے پولیس نے فوری تحقیقات شروع کر دیں۔ خاتون کانسٹیبل کی جانب سے تفصیلی پوچھ گچھ کے دوران خاتون نے بالآخر اعتراف کرلیا کہ اس کا اصل نام مسرت غفور ہے۔
مسرت غفور نے پولیس کو بتایا کہ اس کے ساتھ نہ کوئی تشدد ہوا اور نہ ہی زیادتی کا کوئی واقعہ پیش آیا۔ اس نے اعتراف کیا کہ شاہد کو پھنسانے کے لیے راجہ ریاضت نامی شخص کے کہنے پر پورا واقعہ من گھڑت طور پر تیار کیا گیا تھا۔
ابتدائی تفتیش کے مطابق من گھڑت الزام تراشنے والی خاتون مسرت غفور نے جان بوجھ کر رائیڈ ہیلنگ ڈرائیور کو استعمال کرتے ہوئے ہنگامی ہیلپ لائن 15 پر کال کروائی تاکہ واقعے کو حقیقی ظاہر کیا جا سکے۔
پولیس نے جھوٹے الزامات کے ذریعے ایک شخص کو مبینہ طور پر پھنسانے اور اس حوالے سے من گھڑت کہانی تیار کرنے کے الزام میں مسرت غفور اور راجہ ریاضت کے خلاف باقاعدہ مقدمہ درج کرلیا ہے۔
