عمران خان کا جانا اچھی خبر، پرانے پاکستان میں ملاقات ہوگی۔مریم نواز

گجرات: پاکستان مسلم لیگ (ن) کا مہنگائی مارچ سرائے عالمگیر پہنچ گیا، ن لیگ کی نائب صدر مریم نواز نے کہا ہے کہ عمران خان کا جانا اچھی خبر ہے جبکہ حکومت برخاستگی کے بعد عوام سے پرانے پاکستان میں ملاقات ہوگی۔

تفصیلات کے مطابق سرائے عالمگیر میں ن لیگی کارکنان اور شرکائے مہنگائی مکاؤ مارچ سے خطاب کرتے ہوئے سابق وزیر اعظم نواز شریف کی صاحبزادی مریم نواز نے کہا کہ آج لانگ مارچ کا اسلام آباد میں ہمارا آخری جلسہ ہوگا۔

یہ بھی پڑھیں:

عمران خان کا استعفیٰ ہی ان کے لئے عزت کا راستہ ہے، سراج الحق

خطاب کے دوران ن لیگ کی نائب صدر مریم نواز نے کہا کہ قومی اسمبلی میں ہماری تحریکِ عدم اعتماد کامیاب ہوگی۔ اچھی خبر یہ ہے کہ عمران خان جا رہا ہے، نواز شریف آرہا ہے۔ عوام اسلام آباد جلسے میں شریک ہو کر حکومت کی گرتی دیوار کو دھکا دیں۔

مہنگائی مارچ کے شرکاء اور ن لیگی کارکنان کا لہو گرماتے ہوئے مریم نواز نے کہا کہ اب پرانے پاکستان میں ملاقات ہوگی۔ قبل ازیں اپوزیشن لیڈر پنجاب اسمبلی حمزہ شہباز کا کہنا تھا کہ عمران خان کی پیشی عوامی عدالت میں ہونے والی ہے۔

حمزہ شہباز نے مہنگائی مکاؤ مارچ کے شرکاء سے خطاب کرتے ہوئے کہا کہ ہم اسلام آباد سے خالی ہاتھ لوٹنے والے نہیں۔ حکومت جتنی مرضی گیدڑ بھبکیاں دے، قومی اسمبلی میں تحریکِ عدم اعتماد کامیابی سے ہمکنار ہوگی۔