حیدر آباد سمیت سندھ کے 9 اضلاع میں بلدیاتی انتخابات ملتوی کردئیے گئے

کراچی: الیکشن کمیشن نے حیدر آباد سمیت سندھ کے 9 اضلاع میں بلدیاتی انتخابات ملتوی کردئیے ہیں جبکہ یہ فیصلہ حیدر آباد سمیت سندھ کے مختلف شہروں میں بارش کے باعث کیا گیا ہے۔

تفصیلات کے مطابق حیدر آباد سمیت سندھ کے 9 اضلاع میں بلدیاتی انتخابات الیکشن کمشنر سندھ اور ضلعی انتظامیہ کی سفارش پر ملتوی کیے گئے جبکہ کراچی ڈویژن میں بھی بلدیاتی انتخابات ملتوی کرنے کے حوالے سے فیصلہ کیا جائے گا۔ 

یہ بھی پڑھیں:

سندھ حکومت کی بلدیاتی انتخاب رکوانے کی کوشش ناکام

الیکشن کمیشن نے کراچی ڈویژن میں بارش کی صورتحال سمیت الیکشن کے انعقاد کیلئے حالات کا جائزہ لینے کی غرض سے آج اجلاس طلب کر لیا جس کے دوران شہرِ قائد میں بلدیاتی انتخابات کے انعقاد پر اہم فیصلہ متوقع ہے۔ 

اس حوالے سے الیکشن کمیشن کا کہنا ہے کہ آج کے اجلاس میں بارشوں اور سیلاب کی صورتحال کا جائزہ لینے کے بعد کراچی ڈویژن میں بلدیاتی انتخابات منعقد کرنے یا نہ کرنے سے متعلق حتمی فیصلہ ہوگا۔ 

خیال رہے کہ اس سے قبل الیکشن کمیشن نے سندھ میں دوسرے مرحلے کے بلدیاتی انتخابات کے التوا کی سندھ حکومت کی درخواست مسترد کردی تھی۔

ترجمان الیکشن کمیشن نے گزشتہ روز درخواست مسترد کیے جانے کے متعلق وضاحت کرتے ہوئے کہا کہ کراچی ڈویژن میں بلدیاتی انتخابات مقررہ شیڈول کے مطابق 28 اگست کو ہی ہوں گے۔