گوگل نیوز پر ہمیں فالو کریںقومی کرکٹ ٹیم کے آل راؤنڈر خوشدل شاہ نے پاکستان کرکٹ چھوڑنے اور امریکا کی جانب سے کھیلنے کی خبروں کی تردید کردی۔
سوشل میڈیا پر گزشتہ کچھ عرصے سے یہ خبریں گردش کر رہی تھیں کہ خوشدل شاہ پاکستان کرکٹ سے علیحدگی اختیار کرکے امریکا کی جانب سے کھیلنے کا ارادہ رکھتے ہیں۔ تاہم آل راؤنڈر نے ان خبروں کو بے بنیاد اور من گھڑت قرار دیتے ہوئے وضاحت جاری کردی ہے۔
خوشدل شاہ نے سماجی رابطے کی ویب سائٹ ایکس پر اپنے بیان میں کہا کہ ان کے پاکستان کرکٹ چھوڑنے سے متعلق جھوٹی خبریں گردش کر رہی ہیں۔ پاکستان کو اپنا گھر قرار دیتے ہوئے انہوں نے کہا کہ اپنے ملک کی نمائندگی ہمیشہ ان کی اولین ترجیح اور سب سے بڑا اعزاز رہی ہے۔
قومی آل راؤنڈر نے مداحوں سے اپیل کی کہ وہ بے بنیاد افواہوں پر یقین نہ کریں۔ ان کا کہنا تھا کہ پاکستان کرکٹ کے ساتھ ان کی وابستگی میں کبھی تبدیلی آئی ہے اور نہ ہی مستقبل میں آئے گی۔
خوشدل شاہ کے اس بیان کے بعد امریکا کی جانب سے کھیلنے اور پاکستان کرکٹ چھوڑنے سے متعلق سوشل میڈیا پر گردش کرنے والی افواہوں کی واضح طور پر تردید ہوگئی ہے۔
