میٹرو بس کے 300ملازمین 3ماہ سے تنخواہوں سے محروم، بیروزگار ہونے کا خطرہ

راولپنڈی:اسلام آباد اور راولپنڈی میٹرو بس سروس کے ان بکس ٹکٹنگ اسٹاف کے 3 سو ملازمین کو گزشتہ 3ماہ سے تنخواہیں ادا نہیں کی گئیں، جبکہ ملازمین کے سروں پر بیروزگاری کی تلوار لٹکنے لگی۔

4-6-2015کو بھرتی کیے گئے تمام ان بکس ٹکٹنگ اسٹاف کو تاحال ای او بی آئی الاؤنسز اور گریجویٹی تک نہیں دی گئی،300ملازمین میں تشویش کی لہر دوڑ گئی۔

ٹکٹنگ اسٹاف سپروائزر اکمل نے ایم ایم نیوز سے گفتگو کرتے ہوئے بتایا کہ ہمیں گزشتہ تین ماہ سے میٹرو بس سروس انتظامیہ کی طرف سے تنخواہیں نہیں دی گئیں، ہم لوگوں نے رمضان المبارک میں بھی سحری افطاری بھیک مانگ کر کی ہے۔

اُن کا کہنا تھا کہ ہماری فیملیز اس وقت اذیت و کرب مبتلا ہیں،ہمارے گھروں میں راشن ختم ہو چکا ہے، مکانوں کے تین ماہ کے کرائے جات یوٹیلیٹی بلز ابھی ادا کرنے باقی ہیں۔

ہمارے ساتھ دھوکہ کیا گیا ہے،پہلے ہم سے مختلف پیپرز پر دستخط لے لیے گئے، پھر چند دنوں کے بعد ہمارے گھروں میں ہمیں ٹرمینیشن لیٹر بھیج دیے گئے ہیں جس کے تحت کو ہماری نوکریاں 31مئی کو ختم ہوجائیں گی۔

انہوں نے کہا کہ ہماری تنخواہیں اور بقایاجات کا کچھ پتہ نہیں کہ وہ کب ملتی ہیں؟لیکن ابھی تک تین ماہ سے ہم خواری کاٹ رہے ہیں، عید بھی ہم نے کسمپرسی میں گزاری ہے،ہمیں یک جنبش قلم سے بے روزگار کیا جا رہا ہے۔

موجودہ حکومت نے روزگار دینے کا وعدہ کیا تھا جبکہ ہم 300افراد بے روزگار ہو رہے ہیں،ہم وزیراعظم عمران خان اور وزیر اعلیٰ پنجاب عثمان بزدار سے اپیل کرتے ہیں کہ ہمیں بے روزگار ہونے سے بچایا جائے۔

انہوں نے کہا کہ ہماری تین ماہ کے کی تنخواہیں اور واجبات دلائے جائیں،تاکہ ہمارے بچے بھوک افلاس سے نہ مر جائیں،ہم بے گھر ہو رہے ہیں،ہماری فریاد سنی جائے۔