حافظ نعیم الرحمان کا مرتضیٰ وہاب کو برطرف کرنے کا مطالبہ

جماعتِ اسلامی کراچی کے امیر حافظ نعیم الرحمان نے ترجمان سندھ حکومت بیرسٹر مرتضیٰ وہاب کی بطور ایڈمنسٹریٹر کراچی برطرفی کا مطالبہ کرتے ہوئے کسی غیر سیاسی شخص کو ایڈمنسٹریٹر مقرر کرنے کی تجویز دی ہے۔

تفصیلات کے مطابق جماعتِ اسلامی کراچی ڈویژن کے امیر حافظ نعیم الرحمان نے کراچی میں پریس کانفرنس کے دوران کہا کہ بلدیاتی الیکشن کے اعلان کے بعد سیاسی ایڈمنسٹریٹر کی ضرورت باقی نہیں رہتی۔ موجودہ سٹی ایڈمنسٹریٹر کو برطرف کیاجانا چاہئے۔

یہ بھی پڑھیں:

پنجاب کی 5 مخصوص نشستوں پر کامیاب پی ٹی آئی امیدواروں کی حلف برداری 

سندھ حکومت پر الیکشن کو یرغمال بنانے کا الزام عائد کرتے ہوئے امیر جماعتِ اسلامی کراچی نے کہا کہ الیکشن کمیشن کے کون سے قواعد وضوابط پورے ہورہے ہیں؟ اگر کمیشن نے نوٹس نہ لیا تو سپریم کورٹ اور ہائیکورٹ کو لینا ہوگا۔

امیر جماعتِ اسلامی کراچی نے کہا کہ سندھ حکومت ٹینکر مافیا کی پشت پناہی کر رہی ہے۔ کتنے ہی علاقوں میں پانی 1 سے 2 ماہ بعد آتا ہے۔بعض علاقوں میں پانی بجلی آنے کے 15روز بعد ملتا ہے۔ لائنوں میں عدم دستیاب پانی ٹینکرز کیلئے دستیاب ہوجاتا ہے۔

حافظ نعیم الرحمان نے پانی کا منصفانہ نظام قائم کرنے کا مطالبہ کرتے ہوئے کہا کہ 650 ملین گیلن کا کے 4منصوبہ مکمل ہونا ضروری ہے۔ پی پی پی وفاق میں بھی موجود ہے اور اب وفاق سے بات کرنے کا نہیں کہا جاسکتا۔

انہوں نے کہا کہ سندھ حکومت نالوں پر کرینیں کھڑی کرکے کہتی ہے کہ کام ہوگیا۔ یہ جھوٹ اور دھوکہ دہی ہے۔ کراچی کے پاس 24جولائی کا موقع ہے۔ جماعتِ اسلامی کا میئر کراچی میں اپنے اختیار سے بڑھ کر کام کرے گا۔ اپنا اختیار لڑ کر لے گا۔ ٓ