ملک میں 13 حکمران پارٹیاں اور اکیلا عمران خان ہے، شیخ رشید

راولپنڈی: عوامی مسلم لیگ کے سربراہ شیخ رشید نے کہا ہے کہ ملک میں 13 حکمران پارٹیاں اور اکیلا عمران خان ہے۔

تفصیلات کے مطابق لال حویلی میں پریس کانفرنس کرتے ہوئے سابق وفاقی وزیر شیخ رشید نے کہا کہ ملک میں 13 حکمران پارٹیاں اور اکیلا عمران خان ہے۔ اسٹیٹ بینک 7 ارب ڈالر پر آگیا، آٹا 100 روپے کلو ہوگیا۔ تمام طاقتیں ملک کو تباہی اور تصادم سے بچا لیں۔

شیخ رشید نے کہا کہ دعا ہے یہ الیکشن پر جائیں،انتخابات میں جتنی تاخیر ہوگی، عمران خان کو فائدہ ہوگا۔حکمرانوں کو مفت مشورہ ہے، الیکشن میں تاخیر نہ کریں۔ انہوں نے کہا کہ امپورٹڈ حکومت سے ہمارے کمزور حلقے مزید مضبوط ہوگئے ہیں۔ تیرہ کی تیرہ پی ڈی ایم جماعتیں غرق ہو چکی ہیں۔

انہوں نے کہا کہ کل میرے علاقے میں 77 ڈکیتیاں ہوئیں، 7 کروڑ مزید غریب ہوگئے۔ کل فیصل آباد میں غربت کے ہاتھوں باپ نے دو بیٹیاِں قتل کر دیں۔میری تین بہنوں کے گھروں پر چھاپے مارے گئے، راولپنڈی میں بھی بھتہ پرچیاں ملنے لگی ہیں۔ شہباز گل کے ڈرائیور کی کمسن بچی اور بیوی کے ساتھ جو ظلم ہوا وہ قابل مذمت ہے۔

یہ بھی پڑھیں:

پاکستان اور برطانیہ میں بہترین دفاعی تعلقات پائے جاتے ہیں، آرمی چیف

شیخ رشید کا کہنا تھا کہ کل ہم لال حویلی میں تاریخی جلسہ کریں گے۔ آتش بازی ہوگی۔ عمران خان کی تقریر بھی سنائی جائے گی۔کے پی کے میں باڑ لگی ہے، طالبان کیسے آگئے؟ یہ بڑا سوالیہ نشان ہے۔بلاول بھٹو کو دوروں سے فرصت نہیں۔ ابھی تک دفتر نہیں جارہا۔ معیشت بچانے کے لیے آرمی چیف ممالک سے رابطے کرنے پر مجبور ہیں۔

انہوں نے مزید کہا کہ اکتوبر نومبر تک انتخابات کے دعوے پر قائم ہوں۔ ادارے اور عدلیہ ہماری قوت ہیں، انہیں متنازع نہیں بنانا چاہیے۔ سیاست دان اپنے گندے کپڑے اوپن نہ دھوئیں۔ آرمی چیف کو برطانیہ میں سلامی پر فخر ہے۔ وہ پاکستان کو سلامی ملی۔ الیکشن کی ڈیٹ دیں تو تمام سیاست دانوں کو مل کر بیٹھنا چاہیے۔

سابق وفاقی وزیر نے کہا کہ میری وزارت داخلہ میں کسی کی نہ گرفتاری ہوئی، نہ ہی کوئی مقدمہ درج ہوا ۔ مئی میں ایف سی نے نہیں، رینجرز نے بچوں اور خواتین پر تشدد کیا، اس کا نوٹس لینا چاہیے۔ تمام سیاست دان جی ایچ کیو کے گیٹ 4 کی پیداوار ہیں۔ ووٹ کی عزت انہوں نے دو ٹکے میں بیچ دی۔ وزیروں کے پاس کوئی محکمہ نہیں ہے، 3 اور آنے والے ہیں ۔