گوگل نیوز پر ہمیں فالو کریںاسلام آباد: وفاقی وزیر برائے مواصلات و پوسٹل سروسز مراد سعید نے ترک صدر رجب طیب اردوان کو پاکستان میں خوش آمدید کہنے کے لیے منفرد انداز اپنایا ہے۔
سماجی رابطے کی ویب سائٹ ٹوئٹر پر اپنے پیغام میں انہوں نے ترک صدر رجب طیب اردوان کی ایک ویڈیو شیئر کی جس میں پاکستان سے یکجہتی اور گہرے برادرانہ جذبات کا اظہار کیا گیا ہے۔
شیئر کی گئی ویڈیو میں ترک صدر رجب طیب اردوان کہتے ہیں کہ سب کو معلوم ہے پاکستانی بھائی ہمارے دلوں میں خاص مقام رکھتے ہیں۔ ہم نے اپنی آزادی کی جنگ میں ان کی محبت اور امداد کو کبھی نہیں بھلایا۔
ویڈیو میں ترک صدر نے کہا کہ ہم نے علامہ اقبال کی ان نظموں کو کبھی فراموش نہیں کیا جو انہوں نے ہماری آزادی کے لیے لکھیں۔ قدرتی آفت ہو یا دہشت گردی کے خلاف جنگ، پاکستان نے ہمیشہ ہمارا ساتھ دیا۔
ترک صدر نے کہا کہ ترکی پاکستان کے ساتھ نہایت مضبوط، مخلصانہ اور کئی جہتوں میں تعمیری تعلقات رکھتا ہے۔ پاکستانی بہن بھائیوں کا شکریہ کہ وہ اپنے ترک بھائیوں کی اس محبت سے بخوبی آگاہ ہیں۔
وزیر مواصلات و پوسٹل سروسز نے ویڈیو کے ساتھ مرحبا اردوان لکھ کر پاکستان کی طرف سے بھی بھائی چارے اور گہرے مذہبی و ثقافتی تعلقات کا اظہار کیا۔
#مرحبااردگان pic.twitter.com/Mv58ZP8uQ7
— Murad Saeed (@MuradSaeedPTI) February 13, 2020
یاد رہے کہ اس سے قبل وفاقی وزیر برائے پارلیمانی امور علی محمد خان نے ترک صدر رجب طیب اردوان کی پاکستان آمد پر مسرت کا اظہار کرتے ہوئے کہا کہ پاکستان ترک صدر کے استقبال کے لیے تیار ہے۔
ٹوئٹر پر گزشتہ روز اپنے پیغام میں وزیر پارلیمانی امور علی محمد خان نے کہا کہ پاکستانی عوام ترکی کے صدر رجب طیب اردوان کا استقبال کرتے ہیں جو ہمارے سب سے اہم مہمان ہیں۔
مزید پڑھیں: ترک صدر کے استقبال کے لیے تیار ہیں۔علی محمد خان
