وفاقی وزیر کی صاحبزادی ایمان مزاری کا کیس، سماعت آئندہ ماہ تک ملتوی

اسلام آباد: عدالت نے وفاقی وزیرِ انسانی حقوق ڈاکٹر شیریں مزاری کی صاحبزادی ایمان مزاری سے متعلق کیس کی سماعت آئندہ ماہ تک ملتوی کردی ہے۔

تفصیلات کے مطابق اسلام آباد ہائیکورٹ میں چیف جسٹس اطہر من اللہ کی سربراہی میں سوشل میڈیا قواعد کے خلاف درخواست پر سماعت ہوئی۔ چیف جسٹس  نے ایمان مزاری کے وکیل سے سوال کیا کہ کیا آپ نے سوشل میڈیا رولز پڑھے ہیں؟

یہ بھی پڑھیں:

شیریں مزاری کی صاحبزادی، کارکن انسانی حقوق ایمان مزاری پر بغاوت کا مقدمہ درج

چیف جسٹس اطہر من اللہ نے کہا کہ آپ نے کافی مناسب ضابطے کا حوالہ دیا۔ ریگولیشن غیر قانونی نہیں، ان کو اختیار ہے کہ رولز بنائیں۔ متنازعہ اور غیر قانونی مواد کو ہٹانے کا رول بنادیا گیا ہے۔ کسی کے مذہبی جذبات کو ٹھیس پہنچانا جرم ہے۔

اسلام آباد ہائیکورٹ نے فریقین کو مقررہ تاریخ پر پیش ہونے کی ہدایت کی، بعد ازاں  ایمان مزاری کے وکیل کو سوشل میڈیا رولز کے مطالعے اور کیس کی تیاری کرکے پیش کرنے کی ہدایت کرتے ہوئے درخواست کی سماعت آئندہ ماہ 4 اپریل تک ملتوی کردی۔ 

خیال رہے کہ اس سے قبل  وفاقی وزیرِ انسانی حقوق ڈاکٹر شیریں مزاری کی صاحبزادی، کارکن انسانی حقوق اور مشہورومعروف وکیل ایمان زینب مزاری اور رکنِ قومی اسمبلی محسن داوڑ کے خلاف بغاوت کا مقدمہ درج کیا گیا۔

رواں ماہ کے آغاز میں بلوچ طلبہ نے احتجاج کیا تھا جس پر پولیس نے لاٹھی چارج کیا۔ رکنِ قومی اسمبلی محسن داوڑ سمیت احتجاج میں شریک سیکڑوں طلبہ کے خلاف ایف آئی آر درج ہوئی۔ایمان مزاری کے خلاف مقدمے میں بغاوت کی دفعہ 120 بی شامل کی گئی۔