رمیش کمار نے ایف آئی اے میں شہباز گل کے خلاف درخواست دیدی

اسلام آباد: پی ٹی آئی کے منحرف رکنِ قومی اسمبلی رمیش کمار نے وفاقی تحقیقاتی ادارے (ایف آئی اے) کو معاونِ خصوصی ڈاکٹر شہباز گل کے خلاف درخواست دے دی ہے۔

تفصیلات کے مطابق  پی ٹی آئی کے ناراض رکنِ قومی اسمبلی نے اپنی درخواست میں ٹی وی پروگرام کے دوران ہتک آمیز اور گالی گلوچ پر مبنی گفتگو کے خلاف شکایت کی۔ رمیش کمار کا کہنا ہے کہ شہباز گل کے خلاف پیکا ایکٹ کے تحت کارروائی ہونی چاہئے۔

یہ بھی پڑھیں:

عمران خان وزیراعظم رہنے کا آئینی، قانونی اوراخلاقی جواز کھو چکے ہیں، مریم نواز

اپنی درخواست میں رمیش کمار ونکوانی نے مزید کہا کہ پی ٹی آئی کارکنان کو میرا فون نمبر دے دیا گیا ہے جو مجھے دھمکا رہے ہیں۔ کچھ کارکنان پارلیمنٹ لاجز کے رسیپشن سے فون کرکے میری اہلیہ کو دھمکانے لگے۔

ایم این اے رمیش کمار کا کہنا ہے کہ شہباز گل نے میری اور میرے خاندان کی زندگی کو خطرے میں ڈال دیا ہے۔ یہی وجہ ہے کہ مجھے سندھ ہاؤس منتقل ہونا پڑا اور سندھ ہاؤس پر بھی کارکنان نے حملہ کردیا تھا۔ شہباز گل کے خلاف کارروائی کی استدعا ہے۔

خیال رہے کہ اس سے قبل سندھ ہاؤس پر حملے کے الزام میں گرفتار پی ٹی آئی کارکنان کو ضمانت پر رہا کردیا گیا۔ عدالت نے 13ملزمان کی ضمانت منظور کر لی۔ تحریکِ انصاف کے اراکینِ اسمبلی اور کارکنان نے سندھ ہاؤس میں توڑ پھوڑ کی تھی۔

تحریکِ انصاف کے کارکنان کو گزشتہ روز صبح کے وقت مقامی مجسٹریٹ کی عدالت میں پیش کیا گیا اور وکیلِ صفائی نے ملزمان کی ضمانت کیلئے استدعا کی۔ معزز جج نے ملزمان کو ضمانت پر رہائی کا پروانہ دے دیا۔