قائد اعظم کے اصولوں پر چل کر ہی ملک ترقی کرسکتا ہے، وزیراعلیٰ سندھ

کراچی : وزیراعلیٰ سندھ سید مراد علی شاہ نے کہا ہے کہ قائداعظم پاکستان کو ایک پرامن اور ویلفیئر اسٹیٹ بنانا چاہتے تھے،اگر ہم سب قائد اعظم کے اصولوں پر چلیں گے تو یہ ملک ترقی کرے گا۔

بانی پاکستان قائد اعظم محمد علی جناح کے 73 ویں یوم وفات کے موقع پر وزیراعلیٰ سندھ سید مراد علی شاہ نے مزار قائد پر حاضری دی، پھولوں کی چادر چڑھائی اور دعا کی۔

اس موقع پر میڈیا سے گفتگو کرتے ہوئے وزیراعلیٰ سندھ سید مراد علی شاہ نے کہا کہ اگر ہم سب قائد کے اصولوں پر چلیں تو یہ ملک ترقی کرے گا، جب قائد نے یہ ملک بنایا تھا تو کشمیر پاکستان کا حصہ بنا تھا،اس کے بعد بھارت نے جارحیت کی اور کشمیر پر قبضہ کیا، ہمیں کشمیری بھائیوں کو بھی یاد رکھنا چاہئے۔

وزیراعلیٰ سندھ نے کہا کہ ایک سال پہلے وفاقی حکومت نے کراچی پیکیج کا اعلان کیا تھا، جو سندھ حکومت کا پیکیج میں حصہ ہے اس پر پیش رفت ہوئی ہے، نالوں کی صفائی ہوئی، بارش کا پانی اس مرتبہ اتنا نہیں رکا جو پہلے ہوتا تھا۔

مزید پڑھیں:حکومت نے کالعدم تحریک طالبان کیلئے عام معافی کا عندیہ دیدیا

مراد علی شاہ نے کہا کہ اورنج لائین منصوبہ بھی مکمل ہونے جا رہا ہے ،ہم اس کو گرین لائین کے ساتھ شروع کریں گے، ملیر ایکسپریس وے پر بھی کام شروع ہو رہا ہے، 250 بسوں کیلئے ایک گورنمنٹ ایجنسی نے لانے کیلئے کہا ہے، کے ایم سی کے دو ٹیکسز وصول نہیں ہو رہے ہیں۔

انہوں نے کہا کہ ہم چاہتے ہیں کہ بجلی کے بلز کے ذریعے یہ ٹیکس لئے جائیں، یہ کوئی نئے ٹیکسز نہیں، ہم اس ٹیکس کو مزید کم کریں گے، میں نے وفاقی وزیر خزانہ اور نیپرا چیئرمین سے بات کی ہے، یہ کے ایم سی کے حق میں ہے، میں امریکا ایک ہفتے کیلئے جارہا ہوں اور واپس آؤں گا۔

وزیراعلیٰ سندھ کا کہنا تھا کہ عمرشریف کے علاج کیلئے سندھ حکومت پیچھے نہیں رہے گی، انہوں نے کہا کہ اسٹیل ملز شہید بھٹو نے شروع کی تھی، اسٹیل ملز کے ملازمین کے ساتھ جھوٹے وعدے کئے گئے، گزشتہ وفاقی حکومت سے ہم نے اسٹل مل کو چائنا کے ذریعے چلانے کی بات کی تھا۔