سلیکٹڈ حکومت کی نااہلی ملک کے آگے بڑھنے میں رکاوٹ بن چکی ہے،بلاول بھٹو

اسلام آباد : چیئرمین پاکستان پیپلز پارٹی بلاول بھٹو زرداری نے پیٹرولیم مصنوعات پر اضافے کو مسترد کرتے ہوئے وزیراعظم سے پیٹرول پر ٹیکسز کم کرنے کا مطالبہ کردیا۔

ایک بیان میں بلاول بھٹو زرداری نے کہا کہ وفاقی حکومت کو غریب عوام کی مشکلات کا خیال نہیں ہے، خان صاحب! عوام پر رحم کریںاور پٹرول کی قیمتوں میں اضافہ واپس لیں۔

انہوں نے کہاکہ حکومت نے پھر اپنے اخراجات پورا کرنے کیلئے پیٹرول بم کا سہارا لیا، ایک ماہ میں پیٹرول کی قیمت میں 10 روپے لیٹر اضافہ کیا گیا۔

مزید پڑھیں:نیازی حکومت نے دوسری بار پٹرول بم گرا دیا، فیصلہ واپس لیا جائے۔شازیہ مری

انہوں نے کہاکہ پٹرول مصنوعات میں اضافے سے مہنگائی مزید بڑھے گی، پاکستان مزید مہنگائی کا متحمل نہیں ہوسکتا۔انہوں نے کہا کہ سلیکٹڈ حکومت کی نااہلی ملک کے آگے بڑھنے میں رکاوٹ بن چکی ہے، سلیکٹڈ وزیراعظم سے ملک نہیں چل رہا ہے۔

انہوں نے کہا کہ وزیراعظم فقط جھوٹ بولنے اور سیاسی انتقام کے علاوہ کچھ نہیں جانتے،پیپلزپارٹی نے مشکل ترین حالات کے باوجود پیٹرول کی قیمتوں کومستحکم رکھا۔

گزشتہ روزپی پی پی کی مرکزی سیکریٹری اطلاعات شازیہ مری نے کہا تھاکہ حکومت نے مہنگائی کی ماری عوام پر رواں ماہ دوسری بار پیٹرول بم گرایا، فیصلہ واپس لے کر عوام کو ریلیف دیا جائے۔ نا اہل نیازی حکومت کے عوام پر پیٹرول بم گرانے کی بھرپور مذمت کرتے ہیں۔

مہنگائی کے خلاف بیان جاری کرتے ہوئے رکنِ قومی اسمبلی شازیہ مری نے کہا کہ پی ٹی آئی حکومت عالمی طاقتوں کی ڈکٹیشن پر چل رہی ہے جسے عوام کی کوئی پرواہ نہیں۔ پیپلز پارٹی حکومت کی جانب سے پٹرول کی قیمت میں 1 اعشاریہ 71 روپے فی لٹر اضافے کے عوام دشمن فیصلے کو مسترد کرتی ہے۔