اپوزیشن کے حکومت گرانے کے دعوے بے بنیاد، اتحادیوں پر پورا اعتماد ہے۔وزیر خارجہ

اسلام آباد: وزیرِ خارجہ شاہ محمود قریشی نے اپوزیشن کے حکومت گرانے سے متعلق دعووں کو بے بنیاد قرار دیتے ہوئے ق لیگ اور ایم کیو ایم سمیت اتحادی سیاسی جماعتوں پر مکمل اعتماد کا اظہار کیا ہے۔

تفصیلات کے مطابق تحریکِ انصاف کے نائب چیئرمین اور وزیرِ خارجہ شاہ محمود قریشی نے نجی ٹی وی پروگرام میں گفتگو کرتے ہوئے کہا کہ حکومت گھبراہٹ کا شکار نہیں، ہمیں اپنے اتحادیوں پر مکمل اعتماد ہے۔ پی ٹی آئی حکومت 5سال پورے کرے گی۔

یہ بھی پڑھیں:

پاک چین قیادت کی ملاقات میں افغانستان پر گفتگو آئندہ ماہ ہوگی۔وزیر خارجہ

ایک سوال کے جواب میں وزیرِ خارجہ شاہ محمود قریشی نے کہا کہ ن لیگ اور پیپلز پارٹی کی اٹھک بیٹھک بیٹھے، بات کی اور چلے گئے کی مثال ہیں۔ اگر ن لیگ حکومت کو گرانا اتنا ہی ضروری سمجھتی تو پی ٹی آئی کے لوگوں کو اپنے ٹکٹ کی گارنٹی دیتی۔ 

خیال رہے کہ اس سے قبل وزیر خارجہ شاہ محمود قریشی نے کہا کہ پاکستان اور چین کی قیادت کے مابین آئندہ ماہ مارچ کے دوران ملاقات ہوگی جس کے دوران افغانستان کی صورتحال اور انسانی المیے کے خدشات پر بات چیت کی جائے گی۔

آج سے 2 روز قبل وزیر خارجہ شاہ محمود قریشی نے چینی قیادت کی دعوت پر بیجنگ سرمائی اولمپک گیمز میں شرکت اور چین سے واپسی کے بعد میڈیا سے گفتگو کرتے ہوئے کہا کہ وزیر اعظم نے چینی قیادت سے جامع ملاقاتیں کیں۔