عید الاضحی سے قبل انٹرسٹی پبلک ٹرانسپورٹ کے کرایوں میں اضافہ، کریک ڈاؤن شروع

کراچی: عید الاضحی سے قبل انٹرسٹی اور پبلک ٹرانسپورٹ کے کرایوں میں بلا اجازت اضافہ کردیا گیا جبکہ وزیر ٹرانسپورٹ اویس قادر شاہ کےاحکامات پر زائد کرایہ وصول کرنے والے ٹرانسپورٹرز کے خلاف کاروائی کا آغازبھی ہوگیا ہے۔

محکمہ ٹرانسپورٹ سندھ نے ڈویژنل کمشنرز،ڈی آئی جیز،اور موٹروے پولیس کو خط لکھ کر انٹرسٹی، بین الصوبائی پبلک ٹرانسپورٹ میں کرایوں کی جانچ پڑتال کے لئے نگراں کمیٹیاں قائم کرنے کی ہدایت کی ہے۔

مزید پڑھیں:شہریوں کی بے احتیاطی، کراچی میں کورونا کیسز کی شرح 11فیصد تک پہنچ گئی

صوبائی وزیر ٹرانسپورٹ کا کہنا ہے کہ روزانہ کی بنیاد پر ہائی ویز، موٹروے پر پبلک ٹرانسپورٹ کی چیکنگ کی جائے اورنگراں کمیٹیوں کے ذریعےزائد کرایہ وصول کرنے والے ٹرانسپورٹرز کے خلاف کارروائی کی جائے۔

دوسری جانب سندھ کے وزیرِ ٹرانسپورٹ اویس قادر شاہ نے مطالبہ کیا ہے کہ سی این جی کی قیمت میں اضافے کا فیصلہ واپس لیا جائے۔کراچی سے جاری کیئے گئے ایک بیان میں سندھ کے وزیرِ ٹرانسپورٹ اویس قادر شاہ نے یہ مطالبہ کیا ہے۔

انہوں نے کہاکہ گیس کی بندش کا ڈرامہ اس کی قیمتیں بڑھانے کے لیے کیا گیا تھا، دیگر چیزوں کی طرح سی این جی پر بھی وفاق سبسڈی دے۔

وزیرِ ٹرانسپورٹ سندھ نے کہاکہ پہلے گیس کی فراہمی معطل کی گئی پھر صوبہ سندھ میں سی این جی 17 روپے مہنگی کر دی گئی۔

انہوں نے کہاکہ سی این جی کی قیمتوں میں کیئے گئے اس اضافے سے کیا کرائے اور مہنگائی میں اضافہ نہیں ہو گا؟۔