جاوید لطیف ضمنی انتخابات میں شکست پر برہم، اپنی ہی پارٹی پر تنقید

لاہور: پاکستان مسلم لیگ (ن) کے سینئر مرکزی رہنما میاں جاوید لطیف نے ضمنی انتخابات میں شکست پر برہمی کا اظہار کرتے ہوئے اپنی ہی پارٹی پر شدید تنقید کی ہے۔جاوید لطیف کا کہنا ہے کہ نواز شریف کا نظریہ جیت گیا جبکہ حکومت ہار گئی ہے۔ 

تفصیلات کے مطابق میاں جاوید لطیف ضمنی انتخابات میں شکست پر اپنی ہی پارٹی سے ناراض ہو گئے۔ اپنے ایک بیان میں ن لیگی رہنما کا کہنا ہے کہ نواز شریف کا نظریہ فتحیاب ہوا اور حکومت شکست کھا گئی۔ اب نظریۂ ضرورت کو دفن کرنا پڑے گا۔

یہ بھی پڑھیں:

وزیر اعلیٰ پنجاب نے صوبائی پارلیمانی پارٹی کا اجلاس آج طلب کر لیا

اپنی ہی حکومت کی کارکردگی پر سوالات اٹھاتے ہوئے مسلم لیگ (ن) کے رہنما جاوید لطیف نے کہا کہ مجھے بتایا جائے 3 ماہ میں حکومت نے عوام کے دکھوں کا کیا مداوا کیا؟عوام 3ماہ پہلے کہتے تھے کہ پی ٹی آئی کا ٹکٹ لینے والا کوئی نہیں ہوگا۔

ن لیگی رہنما جاوید لطیف نے کہا کہ آج ٹکٹ نہ لینے والی بات ن لیگ کے بارے میں کہی جارہی ہے۔ الیکشن کمیشن کو عدالتی اختیارات حاصل ہیں، توہینِ عدالت میں کئی وزراء نااہل ہوئے تو عمران خان کون سا ایسا لاڈلا ہے جس کے خلاف کارروائی نہیں ہوتی؟

قبل ازیں نجی ٹی وی پروگرام میں گفتگو کے دوران جاوید لطیف کا کہنا تھا کہ فارن فنڈنگ کیس کو 8سال سے لٹکایا کیوں گیا؟ ضمنی الیکشن ہارنے کی ایک وجہ سابق ٹکٹ ہولڈرز کو نظر انداز کرنا تھی۔ خلاف ورزی کسی جگہ لیڈر نے تو کسی جگہ ووٹرز نے کردی۔