پی ٹی آئی کی کشتی میں سوراخ، اتحادیوں کا رجحان اپوزیشن کیطرف ہے۔پرویز الٰہی

اسلام آباد: ق لیگ کے سینئر مرکزی رہنما و اسپیکر پنجاب اسمبلی چوہدری پرویز الٰہی نے کہا ہے کہ پی ٹی آئی کی کشتی میں سوراخ ہوگیا ہے، اتحادیوں کا رجحان اپوزیشن کی طرف ہے۔

تفصیلات کے مطابق میڈیا سے گفتگو کرتے ہوئے ق لیگی رہنما چوہدری پرویز الٰہی نے کہا کہ عمران خان 100 فیصد مشکل میں ہیں۔ تحریکِ انصاف کے سارے اتحادیوں کا 100 فیصد رجحان حکومت کی بجائے اپوزیشن کی طرف ہے۔

یہ بھی پڑھیں:

او آئی سی اجلاس،اپوزیشن نے لانگ مارچ کا شیڈول تبدیل کردیا

گفتگو کے دوران مسلم لیگ (ق) کے رہنما چوہدری پرویز الٰہی نے کہا کہ ن لیگ، پیپلز پارٹی اور مولانا فضل الرحمان کا اتحاد دیرپا اور پکا ہے۔ جب مخالفین کسی ایک شخص کے خلاف ایک ہوجائیں تو آپس کی تلخیاں بھلا دیتے ہیں۔

مسلم لیگ (ق) کے رہنما پرویز الٰہی نے کہا کہ وزیر اعظم نے دیر کردی۔ پی ٹی آئی کی کشتی میں سوراخ ہوچکا ہے۔ سابق صدر آصف علی زرداری کے پاس 172 سے زیادہ ووٹ ہیں۔ حکومت تڑی نہ لگائے، سب اکٹھے ہو کر آئے تو کوئی روک نہیں سکے گا۔

خیال رہے کہ اس سے قبل پی ڈی ایم نے 23 مارچ کو لانگ مارچ کے قافلوں کو اسلام آباد داخلے سے روک دیا۔ مولانا فضل الرحمان نے کہا کہ لانگ مارچ کے شرکاء 25 مارچ کی شام تک اسلام آباد کی حدود میں داخل ہوں گے۔