ملک کے بہتر مستقبل کیلئے ہر خاندان کو کم از کم 5درخت لگانا ہونگے۔وزیراعظم

اسلام آباد: وزیراعظم عمران خان نے کہا ہے کہ ملک کے بہتر مستقبل اور اپنی آئندہ نسلوں کیلئے ہر خاندان کو کم از کم 5 درخت لگانا ہوں گے جبکہ پاکستان موسمیاتی تبدیلی کے مسائل سے دوچار ہے۔

تفصیلات کے مطابق وزیرا عظم عمران خان نے موسم بہار کی شجرکاری مہم کا افتتاح کرتے ہوئے کہا کہ اسکاؤٹس کے عالمی دن پر پاکستانی اسکاؤٹس کو مبارکباددیتا ہوں۔ بدقسمتی سے ہم ان 10 ممالک میں شامل ہیں جو موسمیاتی تبدیلی کے خطرات کی زد پر ہیں۔

یہ بھی پڑھیں:

تحریکِ عدم اعتماد پرتیاری مکمل ہے،آصف زرداری کی فضل الرحمان کویقین دہانی

پاکستان کی تعریف کرتے ہوئے عمران خان نے کہا کہ اللہ نے ہمارے وطن کو بےشمار نعمتیں اور 12موسم دیئے، یہاں ہر قسم کا پودا اور پھل لگایا جاسکتا ہے، ہمیں اللہ کی نعمتوں کی قدر کرنا ہوگیا۔ماحولیاتی آلودگی نعمتوں کا صحیح استعمال نہ کرنے سے پیدا ہوتی ہے۔

تقریب سے خطاب کے دوران وزیر اعظم نے کہا کہ ہم درخت اپنے مستقبل کو محفوظ بنانے کیلئے لگاتے ہیں۔ نوجوان نسل کو درخت لگانے کی ذمہ داری لینا ہوگی۔ والدین سے بھی کہتا ہوں کہ اپنے بچوں کے مستقبل کیلئے 5 درخت فی خاندان لگائیں۔ 

 وزیر اعظم نے کہا کہ اسپرنگ پلانٹیشن کے تحت 54کروڑ پودے لگائے جائیں گے، ہدف 10 ارب درخت لگانا ہے۔ انگریز نے جو درخت لگائے تھے، ہم نے ان کو بھی تباہ کردیا۔ شجر کاری مہم آئندہ نسلوں کے مستقبل کی ضمانت ہے۔