تحریکِ عدم اعتماد پر گفتگو، شہباز شریف سراج الحق سے ملاقات آج کرینگے

اسلام آباد: پاکستان مسلم لیگ (ن) کے صدر شہباز شریف امیر جماعتِ اسلامی سینیٹر سراج الحق سے ملاقات آج کریں گے جس کے دوران تحریکِ عدم اعتماد پر گفتگو ہوگی۔

تفصیلات کے مطابق اپوزیشن نے وزیر اعظم کے خلاف تحریکِ عدم اعتماد جمع کرادی ہے جس پر مشاورت اور نمبر گیم پوری کرنے کیلئے ملاقاتوں کا سلسلہ تیز کردیا گیا۔ شہباز شریف اور سراج الحق کی ملاقات بھی اسی مشن کا حصہ ہے۔

یہ بھی پڑھیں:

قوم کی گھبراہٹ کم، اب عمران نیازی گھبرائیں گے، شہباز شریف

قبل ازیں ق لیگ کے سربراہ سے امیر جماعتِ اسلامی کی ملاقات کی اندرونی کہانی سامنے آئی تھی جس کے مطابق چوہدری شجاعت حسین نے سینیٹر سراج الحق سے پوچھا کہ تحریکِ عدم اعتماد پر کس کے حق میں ووٹ ڈالیں گے؟

امیر جماعتِ اسلامی سینیٹر سراج الحق کا کہنا تھا کہ ہم دیکھو اور انتظار کرو کی پالیسی پر عمل پیرا ہیں۔ تحریکِ عدم اعتماد پر مشاورت سے فیصلہ کیا جائے گا۔ ن لیگ کے صدر شہباز شریف بھی تحریکِ عدم اعتماد پر جماعتِ اسلامی کو ساتھ ملانا چاہتے ہیں۔

خیال رہے کہ اس سے قبل مسلم لیگ (ن)کے صدر شہباز شریف نے تحریکِ عدم اعتماد جمع ہونے کے متعلق سیاسی صورتحال پر روشنی ڈالتے ہوئے کہا کہ آنے والے دنوں میں عمران نیازی مزید گھبرائیں گے، قوم کی گھبراہٹ کم ہوتی جائے گی۔

آج سے 2 روز قبل اپنے بیان میں اپوزیشن لیڈر قومی اسمبلی شہباز شریف نے کہا کہ تحریک عدم اعتماد عوام کا مطالبہ ہے، اپوزیشن عوام کے فیصلے پر عمل کررہی ہے، ملک کو معاشی دیوالیہ پن سے بچانے کے لئے تحریک عدم اعتماد ہی راستہ ہے۔