سیاستدان مصلحتیں چھوڑ کر پاک فوج کیخلاف پراپیگنڈا ناکام بنائیں۔شجاعت حسین

اسلام آباد: پاکستان مسلم لیگ (ق) کے سربراہ چوہدری شجاعت حسین نے کہا ہے کہ سیاستدانوں کو چاہئے کہ مصلحتیں بالائے طاق رکھتے ہوئے پاک فوج کے خلاف منفی پراپیگنڈا ناکام بنائیں۔

تفصیلات کے مطابق اپنے ایک بیان میں سربراہ مسلم لیگ (ق) چوہدری شجاعت حسین نے سیاستدانوں پر زور دیا کہ وہ پاک فوج کے ساتھ مکمل یکجہتی کا اظہار کریں جبکہ فوج نے ہر آفت اور مشکل وقت میں قوم کی مدد اور خدمت کی۔

یہ بھی پڑھیں:

جماعت اسلامی سابق ٹک ٹاکر خاتون کو ٹکٹ دے کر مشکل میں پڑ گئی

بیان میں چوہدری شجاعت حسین نے کہا کہ سیاستدانوں کو اپنے سیاسی مسائل اور مصلحتیں ایک طرف رکھتے ہوئے پاک فوج کے خلاف پراپیگنڈہ مہم کو ناکام بنانا ہوگا۔ قوم سانحۂ لسبیلہ کے شہداء کے لواحقین کے دکھ اور غم میں برابر کی شریک ہے۔

سربراہ ق لیگ نے کہا کہ سب کچھ قابلِ برداشت ہے لیکن پاک فوج کے خلاف پراپیگنڈہ برداشت نہیں کریں گے۔ ہم ملک میں امن و امان کی بحالی اور دہشت گردی کے خاتمے کیلئے پاک فوج کے کردار اور قربانیوں کو سراہتے ہیں۔ 

واضح رہے کہ سوشل میڈیا پر پاک فوج کے خلاف حال ہی میں باضابطہ پراپیگنڈا مہم چلائی گئی جس کے دوران فوج کے شہداء سمیت آرمی آفیسرز اور جوانوں کا تمسخر شامل ہے جس کی صدرِ مملکت اور وزیر اعظم پاکستان نے بھی مذمت کی تھی۔