حکمرانوں کی بد اعمالیوں کی سزا 22کروڑ عوام بھگت رہے ہیں۔سراج الحق

خوشاب: جماعتِ اسلامی کے امیر سینیٹر سراج الحق نے کہا ہے کہ حکمرانوں کی بد اعمالیوں کی سزا 22 کروڑ عوام بھگت رہے ہیں جبکہ قانون کا مذاق اڑانا ان کی عادت بن گئی ہے۔

تفصیلات کے مطابق خوشاب میں جماعتِ اسلامی کی شمولیتی تقریب سے خطاب کے دوران سینیٹر سراج الحق نے کہا کہ حکومت ملک میں تمام تر خرابیوں کی جڑ ہے۔ترقی و خوشحالی اس وقت آئے گی جب حکومت اچھی ہو۔

یہ بھی پڑھیں:

400ملز بند،حکومت آئی ایم ایف کے جال میں پھنس چکی ہے۔شیخ رشید احمد

خطاب کے دوران سراج الحق نے کہا کہ بری حکومت سے ملک میں غربت، بے روزگاری اور بدعنوانی پھیل جاتی ہے۔ ہم 70 سال سے وڈیروں، سرمایہ داروں اور جاگیرداروں کو بھگت رہے ہیں۔ وزرائے اعظم توشہ خانہ کے تحائف اپنی ملکیت سمجھتے تھے۔

امیر جماعتِ اسلامی نے کہا کہ حکمران قانون کا مذاق اڑانا اپنی عادت بنا چکے، قوم پر مسلط لوگ عدالتوں کو تابعدار بنانا چاہتے ہیں تاکہ کرپشن پر ان سے کوئی سوال نہ کیا جائے۔ پاکستان کو اسلام کا نظام چاہئے جس کیلئے جاگیرداروں سے چھٹکارہ چاہئے۔

سینیٹر سراج الحق نے کہا کہ ملک کی تینوں بڑی جماعتیں بری طرح بے نقاب ہوچکی ہیں۔ نعم البدل کے طور پر جماعتِ اسلامی آپ کے سامنے ہے۔ لوگ جماعتِ اسلامی میں اس لیے شامل ہوتے ہیں تاکہ پاکستان میں قرآن و سنت کا نظام لایا جاسکے۔