بلوچستان، پنجگور اور نوشکی میں فائرنگ اور دھماکوں سے خوف پھیل گیا

کوئٹہ: صوبہ بلوچستان کے 2 اضلاع پنجگور اورنوشکی میں فائرنگ اور دھماکوں سے خوف و ہراس پھیل گیا ہے۔ایف سی اہلکاروں اور دہشت گردوں کے مابین مبینہ طور پر فائرنگ کا تبادلہ ہوا۔

تفصیلات کے مطابق ایف سی اہلکاروں کے مابین مبینہ مقابلہ جاری ہے۔ وزیرِ اطلاعات بلوچستان بشریٰ رند کا کہنا ہے کہ دھماکوں، فائرنگ اور اس سے ہونے والے جانی نقصان کے متعلق فی الحال کچھ نہیں کہا جاسکتا۔

یہ بھی پڑھیں:

کراچی، سہراب گوٹھ میں مدرسے پر بجلی کے تار گرنے سے 1بچہ جاں بحق

وزیرِ اطلاعات بلوچستان نے مزید کہا کہ مینگل روڈ، نوشکی بازار میں واقع ایف سی ہیڈ کوارٹرز کے گیٹ نمبر 2 کے باہر دھماکے نتیجے میں سرکاری عمارات کے شیشے ٹوٹے اور سول ہسپتال کو بھی نقصان پہنچنے کی اطلاعات ہیں۔

رات کے وقت بازار بند تھا اور شہریوں کی بھیڑ نہیں تھی۔ وزیرِ اطلاعات بلوچستان کا کہنا ہے کہ ایف سی اور دہشت گردوں کی لڑائی اور فائرنگ کا تبادلہ ہورہا ہے۔ تاریکی کے باعث صورتحال زیادہ واضح نہیں ہوسکی جس پر تشویش ہے۔

وزیر اعلیٰ بلوچستان نے دھماکوں اور فائرنگ کا نوٹس لے لیا۔ حکام سے رپورٹ طلب کرتے ہوئے عبدالقدوس بزنجو نے ہدایت کی کہ دہشت گردوں کو کسی صورت نہ چھوڑا جائے۔ امن کے دشمنوں سے آہنی ہاتھوں سے نمٹا جائے۔

بلوچستان پولیس کے مطابق پنجگور کے علاقے میں گھوڑا چوک کے قریب ہونے والے دھماکے بعد فائرنگ کا سلسلہ شروع ہوا۔ تاحال دھماکوں یا فائرنگ کے نتیجے میں کسی جانی نقصان کی اطلاعات نہیں۔ واقعے پر مزید تحقیقات جاری ہیں۔