ایم کیو ایم احتجاج پر لاٹھی چارج کا کیس، سندھ حکومت نے ملبہ ساؤتھ پولیس پر ڈالدیا

کراچی میں متحدہ قومی موومنٹ (پاکستان) کے احتجاج پر لاٹھی چارج کرنے کا سارا ملبہ سندھ حکومت نے ساؤتھ پولیس پر ڈال دیا۔ ڈپٹی کمشنر کو کلین چٹ دے دی گئی جبکہ اسسٹنٹ کمشنر کا بھی رپورٹ میں کوئی ذکر نہیں ہے۔

تفصیلات کے مطابق وزیر اطلاعات سندھ سعید غنی نے متحدہ کی احتجاجی ریلی پر پولیس کے تشدد کی انکوائری رپورٹ ظاہر کرتے ہوئے کہا کہ وزیر اعلیٰ سندھ نے متحدہ کے مظاہرے پر تشدد پر انکوائری کے احکامات دئیے۔ سیکریٹری داخلہ نے تحقیقات کیں اور رپورٹ وزیر اعلیٰ کو پیش کی۔ رپورٹ کے مطابق 26جنوری کو متحدہ نے ریڈ زون میں احتجاجی مظاہرہ کیا۔

یہ بھی پڑھیں:

عمران خان نے ہر پاکستانی پر قرض میں 50 فیصد اضافہ کر دیا، مریم اورنگزیب

سیکریٹری داخلہ سندھ کی تحقیقاتی رپورٹ کے مطابق ریڈ زون میں واقع ہوٹلز میں کرکٹ کے عالمی کھلاڑی قیام پذیر تھے۔ متحدہ نے اپنے احتجاجی روٹ کی خلاف ورزی کی۔ وزیر اطلاعات سندھ نے کہا کہ روٹ کے مطابق متحدہ کو ریڈ زون کی بجائے مظاہرہ پریس کلب پر کرنا تھا۔پولیس نے بر وقت کارروائی نہیں کی، اس وجہ سے ریلی ریڈ زون میں داخل ہوگئی۔ 

تحقیقاتی رپورٹ کے مطابق متحدہ کی ریلی ریڈ زون میں پہنچنے کی وجہ سے پی ایس ایل کے کھلاڑی پریکٹس کیلئے اسٹیڈیم نہ پہنچ سکے۔ شیڈول کے تحت کھلاڑیوں کو اسٹیڈیم جا کر پریکٹس کرنا تھی۔ متحدہ کے احتجاج پر پولیس نے لاٹھی چارج کیا اور رکنِ سندھ اسمبلی کو زخمی کردیا۔ وزیر اعلیٰ نے تحقیقاتی رپورٹ پر ضروری کارروائی کے احکامات دے دئیے۔

وزیرِ اطلاعات سعید غنی نے کہا کہ وزیر اعلیٰ سندھ نے ڈی آئی جی ساؤتھ زون شرجیل کھرل کو معاملے پر وضاحت پیش کرنے کی ہدایت کرنے کے ساتھ ساتھ آئی جی سندھ کو ایس ایس پی ساؤتھ زبیر شیخ کو فوری طور پر عہدے سے ہٹانے کے احکامات جاری کردئیے۔ایس ایس پی کے خلاف نظم و ضبط کی کارروائی کی بھی ہدایت کی گئی ہے۔

سعید غنی نے کہا کہ متحدہ کے زخمی رکنِ سندھ اسمبلی کی نشاندہی پر تشدد کرنے والے پولیس اکانسٹیبل کو معطل کرنے کے احکامات بھی دے دئیے گئے ہیں۔ واضح رہے کہ انکوائری رپورٹ میں ڈپٹی کمشنر اور اسسٹنٹ کمشنر سمیت شہری انتظامیہ کا ذکر سرے سے موجود ہی نہیں۔ متحدہ کی احتجاجی ریلی پر لاٹھی چارج کا سارا ملبہ ساؤتھ کراچی پولیس پر ڈال دیا گیا ہے۔