کراچی،جناح ہسپتال میں برقع پوش شخص نے چھری سے 2 ڈاکٹرز کو زخمی کردیا

شہرِ قائد میں واقع جناح اسپتال میں برقع پوش شخص نے چھری کے وار 2 ڈاکٹرز کو زخمی کردیا تاہم لیڈی ڈاکٹر حملہ آور سے بال بال بچ گئی۔

تفصیلات کے مطابق چھری سے حملے کا واقعہ جناح اسپتال کے شعبۂ ایمرجنسی میں پیش آیا جہاں برقع پوش ملزم نے چھری کے وار سے ایک لیڈی ڈاکٹر کو زخمی کرنا چاہا تاہم قریب موجود 2 ڈاکٹرز ملزم کے سامنے آ گئے۔ 

یہ بھی پڑھیں:

آٹھویں جماعت کی طالبہ سے اجتماعی زیادتی، 3ملزمان گرفتار

دونوں ڈاکٹرز نے ہم پیشہ لیڈی ڈاکٹر کو حملہ آور سے بچا لیا تاہم حملہ آور نے ڈاکٹرز کو چھری کے وار سے زخمی کر دیا، جنہیں فوری طور پر طبی امداد دی گئی۔ دونوں زخمی ڈاکٹرز کی حالت خطرے سے باہر بتائی جاتی ہے۔

برقع پوش شخص کے حملے کے متعلق جناح اسپتال کی انتظامیہ کا کہنا ہے کہ حملہ کرنے والے ملزم کو پکڑ کر پولیس کے حوالے کر دیا گیا ہے، واقعے کا مقدمہ بھی درج کرایا جائے گا تاکہ ملزم کو سزا دلائی جاسکے۔

حملے کی اطلاع ملنے پر اہلِ علاقہ میں خوف و ہراس پھیل گیا، تاہم برقع پوش شخص کی گرفتاری کے بعد صورتحال رفتہ رفتہ معمول پر آگئی۔ جناح ہسپتال انتطامیہ کا کہنا ہے کہ اسپتال میں معمول کے مطابق علاج معالجہ جاری ہے۔

پی ٹی آئی کے رکن سندھ اسمبلی خرم شیر زمان سمیت دیگر شخصیات نے واقعے کی مذمت کی۔ خرم شیر زمان نے جناح اسپتال میں ڈاکٹرز پر قاتلانہ حملے کی مذمت کرتے ہوئے کہا کہ سندھ پولیس واقعے میں ملوث ملزم کے خلاف سخت کارروائی کرے۔