سنگاپور نے مسلمانوں کے خلاف بنائی گئی فلم کشمیر فائلز پر پابندی عائد کردی

سنگاپور میں مقبوضہ جموں و کشمیر سے ہندوؤں کے اخراج پر مسلمانوں کے خلاف بنائی گئی بھارتی فلم کشمیر فائلز پر پابندی عائد کردی گئی ہے۔ حکام کا کہنا ہے کہ فلم کی نمائش سے مذہبی ہم آہنگی متاثر ہوگی۔

تفصیلات کے مطابق سنگاپوری حکومت نے اپنے ایک بیان میں کہا کہ ہندی زبان کی فلم کشمیر فائلز سنگاپور میں فلمی درجہ بندی کے رہنما اصولوں سے منحرف نظر آتی ہے۔

یہ بھی پڑھیں:

سوناکشی سنہا کے ہاتھ میں انگوٹھی، منگنی کی افواہیں 

سنگاپوری میڈیا سے گفتگو کرتے ہوئے حکام کا کہنا تھا کہ کشمیر فائلز پر ہندوؤں پر ظلم ڈھانے اور مسلمانوں کی اشتعال انگیز و یکطرفہ تصویر کشی کے باعث پابندی لگائی گئی۔

میڈیا سے گفتگو کے دوران حکام نے کہا کہ اس قسم کی تصویر کشی سے مختلف برادریوں کے مابین دشمنی پیدا ہوسکتی ہے اور ہمارے کثیر النسلی اور کثیر مذہبی معاشرے کی ہم آہنگی متاثر ہوگی۔

گفتگو کے دوران حکام نے مزید کہا کہ فلمی درجہ بندی کے رہنما اصولوں کے تحت سنگا پور میں نسلی و مذہبی اکائیوں کی توہین پر مبنی کوئی بھی مواد نشر نہیں کیاجاسکتا۔

واضح رہے کہ کشمیر فائلز کی ہدایات وویک اگنی ہوتری نے دیں، فلم کی کہانی 1990 کی دہائی میں کشمیری پنڈتوں کے مقبوضہ وادی سے مبینہ اخراج پر مبنی ہے جس میں مختلف اداکار شامل ہیں۔

فلم میں انوپم کھیر، متھن چکروتی اور پلوی جوشی سمیت دیگر فنکاروں نے مرکزی کردار نبھائے۔ کشمیر فائلز کو مارچ کے وسط میں بھارت سمیت دیگر ممالک کے سینما گھروں میں ریلیز کیا گیا۔