پنجاب میں ظلم کی انتہا، ڈاکوؤں نے گھر میں گھس کر 15 سالہ لڑکی کو زیادتی کا نشانہ بنا ڈالا

لاہور: پنجاب میں ظلم کی انتہا ہوگئی، ڈاکوؤں نے پتوکی کے ایک گھر میں گھس کر 15 سالہ لڑکی کو زیادتی کا نشانہ بنا ڈالا۔

تفصیلات کے مطابق پنجاب کے شہر پتوکی میں ڈاکوؤں نے 15 سالہ لڑکی سے زیادتی کی، متاثرہ لڑکی کو میڈیکل کے لئے اسپتال منتقل کردیا گیا جبکہ ایک مشتبہ شخص کو حراست میں بھی لے لیا گیا ہے۔

ڈی پی او قصور محمد صہیب اشرف کا کہنا ہے کہ پنجاب فرانزک لیب اورکرائم سین یونٹ کی ٹیمیں جائے وقوع سے شواہد اکٹھے کررہی ہیں۔

واقعے میں ملوث ملزمان کی گرفتاری کے لئے سی اے اے اور ضلعی پولیس کی 5 ٹیمیں تشکیل دے دی گئی ہیں۔ آئی جی پنجاب راؤ سردار علی خان نے لڑکی کے ساتھ کی گئی زیادتی کے واقعہ کا نوٹس لیتے ہوئے ملزمان کو جلد گرفتارکرنے کی ہدایت کی ہے۔

یہ بھی پڑھیں: کراچی، پی سی ہوٹل کی چھت گر گئی، دو افراد جاں بحق، متعدد زخمی

علاوہ ازیں وزیراعلیٰ پنجاب حمزہ شہباز بھی متاثرہ لڑکی کے گھر پتوکی پہنچ گئے، انہوں نے اہل خانہ سے ملاقات کرکے انصاف فراہم کرنے کی یقین دہانی کرادی اور پولیس کو ملزمان کی فوری گرفتاری کے لیے بھی احکامات جاری کیے۔

وزیراعلیٰ پنجاب حمزہ شہباز نے میڈیا سے گفتگو میں کہا کہ متاثرہ خاندان کے آنسو دیکھ کر دل خون کے آنسو رو رہا ہے، ایسے واقعات ماں باپ کا دل چیر دیتے ہیں، ہم ان درندوں کو کیفر کردار تک پہنچائیں گے۔

اُن کا کہنا تھا کہ باپ کے سامنے بیٹی سے زیادتی کا واقعہ معاشرے کے زوال کی نشانی ہے، یہ ہمارے لیے ٹیسٹ کیس ہے اور انشاء اللہ ملزمان جلد قانون کی گرفت میں ہوں گے، متاثرہ لڑکی کو انصاف ملنے تک چین سے نہیں بیٹھوں گا۔