لاہور میں پیش آنے والا واقعہ افسوس ناک اور قابل مذمت ہے، چیف جسٹس

اسلام آباد: چیف جسٹس پاکستان جسٹس آصف سعید کھوسہ کا کہنا ہے کہ لاہور میں پیش آنے والا واقعہ افسوس ناک اور قابل مذمت ہےجو کچھ ہوا وہ نہیں ہونا چاہیے تھا۔

اسلام آباد میں فوری اور سستے انصاف کی فراہمی سے متعلق قومی کانفرنس کے آغاز میں چیف جسٹس نے کہا کہ میں پہلے لاہور کے پی آئی سی میں پیش آنے والے افسوسناک واقعے پر بات کرنا چاہوں گا۔

جسٹس آصف سعید کھوسہ کا کہنا تھا کہ دل والے ہسپتال میں جو ہوا وہ نہیں ہونا چاہیے تھا۔ معزز پیشے سے تعلق رکھنے والوں کو خود احتسابی کےعمل سے گزرنا ہو گا،کیس لاہور ہائیکورٹ میں زیر سماعت ہے اس پر میں زیادہ بات نہیں کر سکتا۔

چیف جسٹس نے کہا کہ ہمیں امید ہے اور ہم دعا کرتے ہیں کہ قانون اور طبی پیشے سے وابستہ افراد اپنے اقدار کی پیروی کریں گے، ساتھ ہی انہوں نے کہا کہ میرا ہمیشہ سے یہ ماننا ہے کہ قانون اور طب معزز ترین پیشہ ہے اور اس پیشے سے جڑے وقار کو برقرار رکھنے کے لیے ہر کوشش کرنی چاہیے۔

مزید پڑھیں: لاہور میں وکلاء کا امراض قلب کے اسپتال پر دھاوا، طبی امداد نہ ملنے پر 6 مریض جاں بحق

جسٹس آصف سعید کھوسہ کا کہنا تھا کہ متاثرہ خاندان کیساتھ اظہار ہمدردی کرتے ہیں، امید ہے اس طرح کے واقعات مستقبل میں پیش نہیں آئیں گے،جو سب ہوا وہ المناک تھا، ناقابل یقین اور حیران کن تھا۔

ان کا مزید کہنا تھا کہ ماڈل کورٹس نے شاندار کارکردگی کا مظاہرہ کیا۔ ماڈل کورٹس کے ذریعے تیز ترین انصاف کی فراہمی یقینی بنائیں، کورٹس نے تاثر پیدا کر دیا دو دن میں فیصلہ آنا ہے۔ ماڈل کورٹس میں کیسز منتقل کرنے کی درخواستیں موصول ہو رہی ہیں۔

ان کا کہنا تھا کہ اللہ نے ہمیں لوگوں کی خدمت کا موقع دیا اور ہم اس موقع کو ضائع کرنے کا موقع نہیں دے سکتے تھے، میرے اندر بلوچ خون مجھے مجبور کرتا ہے کہ کچھ نہ کچھ ایسا کرنا ہے جو بھلائی اور خیر کا ہو۔

چیف جسٹس کا کہنا تھا کہ نظام میں رہتے ہوئے انصاف کے عمل کو مختصر کیا ہے۔ 5 سال کے دوران میرے بینچ میں کوئی کیس کی سماعت ملتوی نہیں ہوئی، جو اچھا کام ہو رہا ہے اسے سپورٹ کرنا چاہیے۔ بے جا تنقید سے دل شکنی ہوتی ہے لیکن حوصلے پسند پست نہیں ہوتے۔