گوگل نیوز پر ہمیں فالو کریںاوکاڑہ کینٹ ریلوے اسٹیشن کے قریب ہفتہ کے روز ایک مال بردار ٹرین پٹری سے اتر گئی جس کے نتیجے میں بوگیاں ٹرین سے الگ ہو کر جی ٹی روڈ پر جا گریں۔
حادثہ اچانک پیش آیا، جس سے ریلوے ٹریک بند ہو گیا اور ٹرینوں کی آمد و رفت معطل ہو گئی۔حادثے کی اطلاع ملتے ہی ریلوے انتظامیہ اور پولیس موقع پر پہنچ گئی اور امدادی کارروائیاں شروع کر دیں۔
مقامی افراد بھی موقع پر جمع ہو گئے اور ریلوے حکام اور پولیس کی مدد میں شریک ہو گئے۔خوش قسمتی سے، اب تک کسی جانی نقصان یا زخمی ہونے کی اطلاع نہیں ملی۔
ریلوے حکام کے مطابق، حادثے کا شکار ہونے والی ٹرین لاہور سے کراچی جا رہی تھی۔ حادثے کے باعث ٹریک بلاک ہو گیا اور ریلوے ٹریفک معطل ہو گئی۔
حکام کا کہنا ہے کہ مرمت کا کام جلد مکمل کر لیا جائے گا جس کے بعد ٹریک کو بحال کر کے ٹرینوں کی آمد و رفت بحال کر دی جائے گی۔
یہاں یہ بات قابل ذکر ہے کہ پاکستان میں ریلوے حادثات معمول بنتے جا رہے ہیں جن کی ممکنہ وجوہات میں تکنیکی خرابیاں اور انتظامیہ کی غفلت شامل ہیں۔ اس بڑھتی ہوئی لاپرواہی کے باعث مسافر ریل کے ذریعے سفر کرنے سے گریز کرنے لگے ہیں۔
ریلوے حکام کا کہنا ہے کہ ملک بھر میں ریلوے ٹریکس کی حالت خراب ہو چکی ہے اور انہیں فوری طور پر مرمت اور تبدیلی کی ضرورت ہے۔ ان کا مزید کہنا تھا کہ ریل کے محفوظ سفر کو یقینی بنانے کے لیے ایک جامع سروے کیا جانا چاہیے تاکہ مستقبل میں اس قسم کے حادثات کو روکا جا سکے۔
