گوگل نیوز پر ہمیں فالو کریںہفتے کے پہلے کاروباری دن پیر کو پاکستان اسٹاک ایکسچینج میں مثبت آغاز دیکھنے میں آیا جہاں کاروبار کے آغاز میں ہی مارکیٹ میں 113 پوائنٹس کا اضافہ ہوا۔
اس اضافے کے بعد 100 انڈیکس 1 لاکھ 13 ہزار 364 پوائنٹس پر پہنچ گیا جو کہ گزشتہ کاروباری سیشن کے 1 لاکھ 13 ہزار 251 پوائنٹس کے مقابلے میں زیادہ ہے۔
گزشتہ کاروباری ہفتے کے آخری دن جمعہ کے روز اسٹاک مارکیٹ میں 532 پوائنٹس کی نمایاں کمی دیکھی گئی تھی، جو صفر اعشاریہ سینتالیس فیصد کی منفی تبدیلی تھی۔
اس کمی کے باعث 100 انڈیکس 1 لاکھ 13 ہزار 784 پوائنٹس سے کم ہو کر 1 لاکھ 13 ہزار 251 پوائنٹس پر آ گیا تھا۔ تاہم آج کے مثبت رجحان نے سرمایہ کاروں کے لیے کچھ حد تک اطمینان بخش صورتحال پیدا کر دی ہے۔
پیر کے روز پاکستان اسٹاک ایکسچینج میں مجموعی طور پر 47 کروڑ 20 لاکھ سے زائد حصص کا لین دین ہوا جو کہ گزشتہ کاروباری روز کے 39 کروڑ 73 لاکھ حصص کے مقابلے میں زیادہ تھا۔ مارکیٹ میں شیئرز کی مجموعی مالیت 22 ارب 77 کروڑ روپے رہی جو کہ گزشتہ کاروباری دن کے 19 ارب 32 کروڑ روپے کے مقابلے میں نمایاں اضافہ ہے۔
اسٹاک مارکیٹ میں پیر کے روز 444 کمپنیوں کے حصص کی خرید و فروخت ہوئی جن میں سے 119 کمپنیوں کے حصص کی قیمت میں اضافہ، 263 کمپنیوں کے حصص کی قیمت میں کمی جبکہ 62 کمپنیوں کے حصص کی قیمت میں کوئی تبدیلی نہیں دیکھی گئی۔
سب سے زیادہ کاروبار کرنے والی کمپنیوں میں پاک انٹرنیشنل بلک سرِفہرست رہی، جس کے 5 کروڑ 22 لاکھ سے زائد شیئرز کی خرید و فروخت ہوئی اور اس کے شیئرز کی قیمت 9 روپے 60 پیسے رہی۔
ورلڈ کال ٹیلی کام دوسرے نمبر پر رہی، جس کے 4 کروڑ 34 لاکھ سے زائد شیئرز کا لین دین ہوا اور فی شیئر قیمت 1 روپے 41 پیسے رہی۔ تیسرے نمبر پر نیشنل بینک ایکس ڈی رہا، جس کے 2 کروڑ 82 لاکھ شیئرز کا کاروبار ہوا اور اس کے شیئرز کی قیمت 80 روپے 1 پیسہ رہی۔
مارکیٹ میں آج کے مثبت رجحان سے سرمایہ کاروں کو امید ہے کہ آئندہ دنوں میں بھی استحکام برقرار رہے گا، تاہم معیشت اور سیاسی صورتحال کے اثرات کے باعث مارکیٹ میں مزید اتار چڑھاؤ کا امکان بھی موجود ہے۔
