گوگل نیوز پر ہمیں فالو کریںکراچی میں عیدالفطر کے موقع پر بازاروں میں رش کے پیش نظر ٹریفک پولیس نے خصوصی پلان تیار کر لیا ہے اور مارکیٹوں میں رکشوں اور ٹیکسیوں کے داخلے پر پابندی عائدکردی گئی ہے۔
ٹریفک پولیس کے مطابق تین تلوار کے علاقے میں بھیڑ کو کم کرنے کے لیے رکشوں، ٹیکسیوں اور آن لائن گاڑیوں کے داخلے پر پابندی ہوگی۔
ٹریفک پولیس نے شہریوں کو ہدایت دی ہے کہ تین تلوار کے علاقے میں رش کی صورت میں کلفٹن برج، ریس کورس اور چوہدری خلیق الزمان روڈ کا استعمال کریں۔
اسی طرح طارق روڈ اللہ والی چورنگی سے اتحاد سگنل تک رکشوں اور ٹیکسیوں کا داخلہ ممنوع ہوگا۔
صدر، فوارہ چوک سے جی پی او اور سنگر چوک سے زیب النساء اسٹریٹ تک بھی رکشوں اور ٹیکسیوں کے داخلے پر پابندی ہوگی جبکہ جامع کلاتھ تبت چوک سے عیدگاہ چوک تک بھی یہی پابندی عائد ہوگی۔
ٹریفک پولیس کے مطابق، ملینیم ڈرگ روڈ سے آنے والی ٹریفک کو ملینیم برج سے موڑ دیا جائے گا جبکہ حیدری مارکیٹ روڈ پر رکشوں اور ٹیکسیوں کے داخلے پر پابندی ہوگی۔
نارتھ کراچی سے آنے والی کمرشل ٹریفک کو فائیو اسٹار چورنگی سے شپ اونر چورنگی اور لنڈی کوتل چورنگی کی جانب موڑ دیا جائے گا جبکہ بورڈ آفس سے آنے والی ٹریفک کو کے ڈی اے چورنگی سے ضیاء الدین چورنگی اور پہاڑ گنج کی طرف بھیجا جائے گا۔
