گوگل نیوز پر ہمیں فالو کریںاستنبول: ترکی میں کے ایف سی اور پیزا ہٹ کے سابقہ فرنچائز آپریٹر نے باضابطہ طور پر دیوالیہ ہونے کی درخواست دائر کر دی ہے۔
یہ اقدام اس وقت سامنے آیا جب یم برانڈز نے گزشتہ ماہ کمپنی کے ساتھ اپنے معاہدے مبینہ طور پر کارپوریٹ معیارات کی خلاف ورزی کے باعث ختم کر دیے تھے۔
ترک خبر رساں ادارے اناضول ایجنسی کے مطابق کے ایف سی اور پیزا ہٹ کے سابقہ فرنچائز آپریٹر کو شدید مالی بحران کا سامنا ہے اور اس پر 7اعشاریہ 7 بلین ترک لیرا (214 ملین امریکی ڈالر) کا قرض ہے۔
اس غیر متوقع مالی بحران کے نتیجے میں ترکی بھر میں 537 ریستوران بند کر دیے گئے ہیں، جن میں 283 کے ایف سی اور 254 پیزا ہٹ برانچز شامل ہیں۔ ان بندشوں کے باعث تقریباً 7000 ملازمین بے روزگار ہو گئے ہیں۔
کے ایف سی اور پیزا ہٹ کے سابقہ فرنچائز آپریٹر کے سی ای او الکیم شاہین نے کمپنی کی سنگین مالی صورتحال پر تبصرہ کرتے ہوئے کہاکہ ہم آج جس حقیقت کا سامنا کر رہے ہیں، وہ اربوں ترک لیرا کا قرض، بینکوں اور سرکاری اداروں کی جانب سے ضبط کی گئی کمپنی کی جائیدادیں، بشمول ہماری فیکٹریاں، اور میری ذاتی جمع پونجی ہے، جسے میں نے ضمانت کے طور پر گروی رکھ دیا تھا۔
اس اعلان کے بعد متاثرہ ملازمین میں شدید غم و غصہ پھیل گیا اور انہوں نے استنبول میں کمپنی کے ہیڈکوارٹر کے باہر احتجاج کیا، جہاں سیکڑوں کارکنان نے اپنے حقوق کے لیے آواز بلند کی۔
یم برانڈز کے چیف فنانشل اور فرنچائزنگ آفیسر کرس ٹرنر کا کہنا تھا کہ کمپنی نے کئی مہینوں تک کے ایف سی اور پیزا ہٹ کے سابقہ فرنچائز آپریٹر کے ساتھ آپریشنل مسائل حل کرنے کی کوشش کی، لیکن ترک آپریٹر معیارات پر پورا اترنے میں ناکام رہا۔
ہم نے مدد فراہم کی اور مسائل کا حل تلاش کیا لیکن آخرکار کے ایف سی اور پیزا ہٹ کے سابقہ فرنچائز آپریٹر ہمارے معیارات پر پورا نہیں اتر سکا اور بنیادی فرنچائز معاہدوں کی پاسداری نہ کر سکا۔
یہ صورتحال ایسے وقت میں سامنے آئی ہے جب ترکی میں مغربی برانڈز کے بائیکاٹ کی مہم زور پکڑ رہی ہے، خاص طور پر ان کمپنیوں کے خلاف جو مبینہ طور پر اسرائیل سے تعلق رکھتی ہیں۔ یہ بائیکاٹ غزہ تنازعے کے بعد مزید شدت اختیار کر گیا ہے، جہاں 7 اکتوبر 2023 کے بعد سے اب تک 47000 سے زائد فلسطینی شہید ہو چکے ہیں۔
ترکی میں کام کرنے والے کئی بین الاقوامی برانڈز، جن میں کے ایف سی اور پیزا ہٹ شامل ہیں، بڑھتی ہوئی تنقید اور صارفین کے بائیکاٹ کا سامنا کر رہے ہیں۔
