گوگل نیوز پر ہمیں فالو کریںنیوزی لینڈ کے اسٹار بیٹر مارک چیپمن دائیں ہیمسٹرنگ میں چوٹ کی وجہ سے پاکستان کے خلاف کل دوسرے ون ڈے میچ میں شرکت نہیں کر سکیں گے۔
یہ چوٹ مارک چیپمن کو پہلے ون ڈے میچ کے دوران نیپیئر میں فیلڈنگ کرتے ہوئے لگی۔
چیپمن جنہوں نے میک لین پارک میں سیریز کے ابتدائی میچ میں کیریئر کےبہترین 132 رنز بنائے اب آکلینڈ واپس جائیں گے تاکہ وہ اپنی صحت یابی پر توجہ مرکوز کر سکیں اور امید ہے کہ وہ ہفتہ کو بے اوول میں ہونے والے تیسرے اور آخری ون ڈے کے لیے واپس آئیں گے۔
ہیملٹن میچ کے لیے ان کی جگہ ٹیم میں ٹاپ آرڈر بیٹر ٹم سیفرٹ کو شامل کیا گیا ہے جو حال ہی میں پاکستان کے خلاف شاندار ٹی ٹوئنٹی سیریز کے بعد منتخب ہوئے ہیں، جہاں انہوں نے 249 رنز بنا کر اسکورنگ میں قیادت کی تھی۔
ہیڈ کوچ گیری اسٹیڈ نے چیپمن کی چوٹ کو بدقسمتی قرار دیا ہے ، انہوں نے اس بات کا اظہار کیا کہ ٹیم سیریز کے اختتامی میچ کے لیے ان کی دستیابی کے بارے میں پُرامید ہے۔
گیری اسٹیڈ نے کہا کہ ون ڈے اسکواڈ کی منتخب ٹیم میں بہترین کھلاڑیوں کو ترجیح دی جاتی ہے تاہم سیفرٹ کی حالیہ فارم نے انہیں اس اسکواڈ میں شمولیت کے لیے موزوں قرار دیا۔ انہوں نے سیفرٹ کے تجربے اور موجودہ بیٹنگ صلاحیتوں کی تعریف کی اور اسے اہم میچ کے لیے قیمتی ٹاپ آرڈر کا آپشن قرار دیا۔
نیوزی لینڈ اس وقت تین میچوں کی ون ڈے سیریز میں 1-0 کی برتری رکھتا ہے، اس سے پہلے ٹی ٹوئنٹی سیریز میں 4-1 سے کامیابی حاصل کی تھی۔
