گوگل نیوز پر ہمیں فالو کریںہملٹن: نیوزی لینڈ نے پاکستان کے خلاف دوسرے ایک روزہ میچ میں 84 رنز سے شاندار کامیابی حاصل کرتے ہوئے تین میچوں کی سیریز میں 0-2 کی ناقابلِ شکست برتری حاصل کر لی۔
وکٹ کیپر بیٹر مچل ہے نے جارحانہ بلے بازی کا مظاہرہ کرتے ہوئے نیوزی لینڈ کو مشکلات سے نکالا اور 78 گیندوں پر 99 رنز بنا کر ناقابلِ شکست رہے۔
انہوں نے آخری اوور میں محمد وسیم کے خلاف دو چھکوں اور دو چوکوں کی مدد سے 22 رنز حاصل کیے۔
نیوزی لینڈ نے مقررہ 50 اوورز میں 8 وکٹوں کے نقصان پر 292 رنز بنائے، محمد عباس نے 41 رنز کی اننگز کھیلی جبکہ دیگر ٹاپ آرڈر بیٹرز اچھی شروعات کے باوجود بڑی اننگز کھیلنے میں ناکام رہے۔
پاکستانی ٹیم ہدف کے تعاقب میں مشکلات کا شکار رہی اور خراب موسم اور تیز ہواؤں میں بیٹنگ کرتے ہوئے صرف 32 رنز پر 5 وکٹیں گنوا بیٹھی۔
نیوزی لینڈ کے تیز گیند باز بین سیئرز نے 59 رنز دے کر 5 وکٹیں حاصل کیں، جیکب ڈفی نے 3 اور وِل او رورک نے 1 وکٹ حاصل کی۔
میچ کے دوران حارث رؤف سر پر گیند لگنے کے بعد میدان سے باہر چلے گئے لیکن ان کی جگہ آنے والے نسیم شاہ نے 51 رنز کی شاندار اننگز کھیل کر فہیم اشرف (73 رنز) کے ساتھ نویں وکٹ کی شراکت میں ٹیم کو کچھ سہارا دیا تاہم بین سیئرز نے نسیم شاہ کو کیچ آؤٹ کروا کر پاکستان کی اننگز 41.2 اوورز میں 208 رنز پر سمیٹ دی۔
اس سے قبل نیوزی لینڈ نے پہلے ون ڈے میں بھی 73 رنز سے کامیابی حاصل کی تھی، جس میں مارک چیپمین کے 132 رنز اور ناتھن اسمتھ کی 4 وکٹیں نمایاں رہیں۔
نیوزی لینڈ اس سے پہلے پانچ میچوں کی ٹی20 سیریز بھی 1-4 سے جیت چکا ہے۔سیریز کا تیسرا اور آخری ون ڈے میچ ہفتے کو ماؤنٹ مانگنوئی میں کھیلا جائے گا۔
