گوگل نیوز پر ہمیں فالو کریںپنجاب کی وزیراعلیٰ مریم نواز شریف نے صوبے بھر میں 13 نئے سستے بازار قائم کرنے کی منظوری دے دی ہے۔
یہ بازار نوشہرہ ورکاں، بورے والا، کبیر والا، سانگلہ، جلالپور، بہاولپور، اٹک اور مری میں قائم کیے جائیں گے۔ ان سستے بازاروں کے جاری منصوبوں کی تکمیل کے لیے اگست کی حتمی تاریخ مقرر کی گئی ہے۔
وزیراعلیٰ مریم نواز نے ضلعی انتظامیہ کو ہدایت دی ہے کہ ان بازاروں کے لیے فوری طور پر زمین مختص کی جائے۔
یہ بازار بتدریج شمسی توانائی پر منتقل کیے جائیں گے جس سے بجلی کے اخراجات میں 70 فیصد تک کمی آئے گی اور اس بچت کا فائدہ عوام کو کم قیمتوں کی صورت میں دیا جائے گا۔
سستے بازاروں کو شمسی توانائی پر منتقل کرنے کے لیے 69 کروڑ روپے سے زائد کے فنڈز کی منظوری بھی دے دی گئی ہے۔
اس منصوبے کا مقصد نچلے اور متوسط طبقے کو سستی اور معیاری اشیائے خورونوش فراہم کرنا ہے۔ وزیراعلیٰ نے اس موقع پر کہا کہ ان کے والد سابق وزیراعظم نواز شریف کے ویژن کے مطابق مہنگائی کا خاتمہ کیا جا رہا ہے۔
واضح رہے کہ پاکستان کی تاریخ کی پہلی خاتون وزیراعلیٰ مریم نواز نے گزشتہ ایک سال کے دوران صوبے میں عوامی فلاح کے درجنوں منصوبے شروع کیے جن کی کارکردگی کو ان کے سیاسی مخالفین بھی تسلیم کرنے پر مجبور ہیں۔
