گوگل نیوز پر ہمیں فالو کریںبھارت کے مقبول ڈرامہ سیریل تارک مہتا کا الٹا چشمہ اور کرائم پیٹرول سمیت دیگر ٹی وی شوز میں اداکاری کے جوہر دکھانے والے معروف اداکار للت منچندا کی لاش پیر کے روز ان کی رہائش گاہ سے برآمد ہوئی۔
پولیس کے مطابق انہوں نے اپنی زندگی کا خاتمہ خود کیا۔پولیس کو اطلاع ملنے پر فوری کارروائی کرتے ہوئے ان کی لاش کو ان کے کمرے سے لٹکی ہوئی حالت میں برآمد کیا گیا جس کے بعد ضروری قانونی کارروائی کے لیے اسے پوسٹ مارٹم کے لیے بھیج دیا گیا ہے۔
واقعے کی ابتدائی تفتیش میں کسی قسم کی زبردستی یا مشکوک سرگرمی کے شواہد نہیں ملے۔ حیران کن طور پر جائے وقوعہ سے کوئی خودکشی کا خط بھی برآمد نہیں ہوا۔
قریبی ذرائع کے مطابق للت منچندا گزشتہ کئی ماہ سے شدید ذہنی دباؤ اور ذاتی مسائل کا شکار تھے۔
پولیس اس افسوسناک واقعے کے پس منظر میں پیش آنے والے حالات کی تحقیقات کر رہی ہے اور اس مقصد کے لیے ان کے اہلِ خانہ اور قریبی دوستوں سے بیانات بھی ریکارڈ کیے جا رہے ہیں۔
اداکار کی ناگہانی موت پر سنی اور ٹی وی آرٹسٹ ایسوسی ایشن نے بھی اظہارِ تعزیت کرتے ہوئے ایک پیغام جاری کیا، جس میں کہا گیا کہ ایسوسی ایشن اپنے دیرینہ رکن للت منچندا کے انتقال پر گہرے دکھ کا اظہار کرتی ہے۔
للت منچندا کی اچانک موت نے شوبز سے جڑے فنکاروں کو افسردہ کر دیا ہے اور پوری ٹی وی انڈسٹری اس المناک خبر پر غم میں ڈوبی ہوئی ہے۔
