گوگل نیوز پر ہمیں فالو کریںلاہور کے علاقے بھاٹی گیٹ میں منگل کے روز ایک افسوسناک واقعہ پیش آیا جہاں 14 سالہ لڑکا معمولی تنازع پر قتل کر دیا گیا۔
مقتول شفیق گھر سے کچھ سامان خریدنے کے لیے نکلا تھا۔ راستے میں اس کی اپنے ہمسایوں سے تلخ کلامی ہوئی جو جھگڑے میں بدل گئی۔
جھگڑے کے دوران ملزم تیمور نے غصے میں آ کر شفیق پر چاقو سے متعدد وار کیے جس سے وہ موقع پر ہی دم توڑ گیا۔
واقعے کی اطلاع ملتے ہی بھاٹی گیٹ پولیس فوری طور پر موقع پر پہنچی اور ملزم تیمور کو گرفتار کر لیا۔ پولیس نے مقدمہ درج کر کے مزید تحقیقات شروع کر دی ہیں۔
ایک اور واقعے میں ریلوے پولیس نے لاہور سے نارووال جانے والی لاسانی ایکسپریس کی مسافرات کے ساتھ ہراسگی کرنے والے تین ملزمان کو گرفتار کر لیا۔
یہ واقعہ ریلوے اسٹیشن پر پیش آیا، جہاں خواتین نے مزاحمت کی تو ملزمان نے اپنے دیگر ساتھیوں کو بلا کر انہیں ہراساں کیا۔ واقعے کی ویڈیو سوشل میڈیا پر وائرل ہوئی جس میں خواتین کو ہراساں کرتے ہوئے دیکھا جا سکتا ہے۔
انسپکٹر جنرل ریلوے پولیس نے واقعے کا فوری نوٹس لیتے ہوئے ملزمان کی گرفتاری کے احکامات جاری کیے، جس کے بعد پولیس نے دو روز کے اندر ملزمان ریحان خالد، محمد حذیفہ اور محسن علی کو گرفتار کر لیا۔ پولیس نے مزید ساتھیوں کی تلاش کے لیے چھاپے مارنے شروع کر دیے ہیں۔
ماہرین کا کہنا ہے کہ کم سن لڑکوں کے قتل اور خواتین سے ہراسگی جیسے واقعات معاشرتی بگاڑ اور قانون کی کمزور گرفت کی عکاسی کرتے ہیں۔ پولیس حکام کا دعویٰ ہے کہ ایسے جرائم میں ملوث عناصر کو کسی صورت رعایت نہیں دی جائے گی۔
