گوگل نیوز پر ہمیں فالو کریںکراچی میں موسلا دھار بارش کے نتیجے میں شہر کے کئی علاقوں میں بجلی کی سپلائی بدستور معطل ہے جبکہ متعدد سڑکوں پر پانی جمع ہونے کی وجہ سے شہریوں کو شدید مشکلات کا سامنا ہے۔
بجلی کی معطلی
شہر کے مختلف حصوں بشمول گلستانِ جوہر کے بلاک 7، 13، 18، محمود آباد، اختر کالونی، منظور کالونی، ڈیفنس ویو اور ملیر کی عالمگیر سوسائٹی میں گزشتہ روز سے بجلی غائب ہے۔ شہری بجلی کی بحالی کے انتظار میں ہیں، جس سے روزمرہ زندگی شدید متاثر ہو رہی ہے۔
برساتی پانی کی نکاسی میں تاخیر
بارش کے بعد جمع ہونے والے پانی کی نکاسی کا عمل تاحال مکمل نہیں ہو سکا۔ ٹاور، آئی آئی چندریگر روڈ، شارع فیصل پر ایف ٹی سی، پی اے ایف میوزیم کے قریب اور یونیورسٹی روڈ پر صفورا کے علاقے میں پانی بدستور موجود ہے۔ اسی طرح ریڈ زون، شاہین کمپلیکس سے آرٹس کونسل تک ایم آر کیانی روڈ، اور ڈاکٹر ضیاء الدین احمد روڈ پر بھی پانی کھڑا ہے جس کی وجہ سے ڈاکٹر ضیاء الدین احمد روڈ کا ٹریک ٹریفک کیلئے بند ہے۔ ڈرگ روڈ اور ناظم آباد انڈرپاس بھی بند ہیں۔
دیگر متاثرہ علاقے
گورنر ہاؤس سے پولیس لائن تک ایوانِ صدر روڈ، کھارادر، ایم اے جناح روڈ پر بولٹن مارکیٹ کے اطراف، اور جامعہ سندھ مدرسۃ الاسلام کے قریب بھی برساتی پانی جمع ہے۔ عیسیٰ نگری کے نزدیک سڑک پر گھٹنوں تک پانی موجود ہے جہاں رات کو خراب ہونے والی گاڑیاں سڑک کنارے کھڑی ہیں۔
عمارت کا انہدام
رنچھوڑ لائن میں ایک پرانی خالی عمارت کا کچھ حصہ گرنے سے ایک خاتون اور ایک مرد زخمی ہو گئے۔ زخمیوں کو فوری طور پر سول اسپتال منتقل کیا گیا، جہاں ان کا علاج جاری ہے۔
کراچی کے شہری حکام سے مطالبہ کر رہے ہیں کہ پانی کی نکاسی اور بجلی کی بحالی کے لیے فوری اقدامات کیے جائیں تاکہ شہریوں کی مشکلات کم ہو سکیں۔
