گوگل نیوز پر ہمیں فالو کریںمعروف پاکستانی یوٹیوبر سعد الرحمٰن المعروف ڈکی بھائی کے خلاف آن لائن جوا بازی کے فروغ اور غیر اخلاقی مواد کی مبینہ اشاعت سے متعلق تحقیقات میں پیش رفت جاری ہے جس کے تحت ان کا جسمانی ریمانڈ مزید چار روز کے لیے بڑھا دیا گیا ہے۔
لاہور کی ضلعی عدالت میں آج کیس کی سماعت ہوئی جہاں نیشنل سائبر کرائم انویسٹی گیشن ایجنسی (NCCIA) نے ڈکی بھائی کو مجسٹریٹ کے سامنے پیش کیا۔ سماعت کے دوران سرکاری وکیل نے مزید تفتیش کے لیے اضافی ریمانڈ کی استدعا کی۔
ڈکی بھائی کے وکیل چوہدری عثمان علی ایڈووکیٹ نے اس درخواست کی مخالفت کی تاہم عدالت نے پراسیکیوشن کا مؤقف تسلیم کرتے ہوئے یکم ستمبر تک جسمانی ریمانڈ منظور کر لیا۔
یاد رہے کہ سعد الرحمٰن کو 17 اگست کو علامہ اقبال انٹرنیشنل ایئرپورٹ، لاہور سے NCCIA حکام نے گرفتار کیا تھا۔ اسی رات ان کے خلاف ایک سرکاری مقدمہ درج کیا گیا، جس میں ان پر الزام ہے کہ وہ یوٹیوب چینل کے ذریعے جوا کھیلنے والی ایپس کی تشہیر اور نامناسب مواد کی اشاعت میں ملوث رہے ہیں۔
واضح رہے کہ ڈکی بھائی کے یوتیب چینل پر لاکھوں سبسکرائبرز ہیں اور سوشل میڈیا پر ان کی گرفتاری کے بعد سے کافی بحث جاری ہے۔
