گوگل نیوز پر ہمیں فالو کریںلاس اینجلس: ہالی ووڈ کی معروف اداکارہ آنا دی آرماس نے بالآخر اپنے اور مشہور اداکار ٹام کروز کے درمیان مبینہ رومانی تعلقات سے متعلق گردش کرتی خبروں پر خاموشی توڑ دی ہے۔
حالیہ رپورٹس کے مطابق دونوں کے درمیان تعلقات کی تمام خبریں بے بنیاد ثابت ہوئی ہیں اور ان کا رشتہ صرف پیشہ ورانہ نوعیت کا ہے۔
فروری سے متعدد مواقع پر دونوں کو ایک ساتھ دیکھا گیا جس کے بعد یہ قیاس آرائیاں زور پکڑ گئیں کہ شاید ٹاپ گن اسٹار ٹام کروز کو ایک نیا ساتھی مل گیا ہے۔ مداحوں نے ان کی ایک ساتھ چھٹیوں اور ہیلی کاپٹر رائیڈز کی تصاویر کو رومانوی تعلقات کی علامت قرار دیا تھا۔
معروف جریدے پیپل میگزین نے اپنی رپورٹ میں انکشاف کیا ہے کہ آنا دی آرماس اور ٹام کروز کے درمیان دوستی صرف پیشہ ورانہ احترام اور فلم سازی کے جذبے پر مبنی ہے۔
ایک قریبی ذریعے کے مطابق آنا دی آرماس نے ٹام کروز کو اپنا عزیز دوست اور رہنما قرار دیا اور کہا کہ وہ ان کے ساتھ وقت گزارنا پسند کرتی ہیں۔
ذرائع کے مطابق آنا دی آرماس کافی عرصے سے سنگل ہیں، اس لیے ان کے حوالے سے پھیلنے والی رومانوی خبروں میں کوئی صداقت نہیں۔ ان دونوں کے درمیان رابطہ صرف فلمی منصوبے تک محدود ہے، جس پر وہ جلد ہی ایک ساتھ کام کرنے جا رہے ہیں۔
آنا دی آرماس نے ایک فیشن میگزین ویمنز ویئر ڈیلی کو انٹرویو دیتے ہوئے کہا کہ سب جانتے ہیں میں ٹام کروز کے ساتھ کام کر رہی ہوں لیکن میڈیا نے ہماری دوستی کو غلط رنگ دیا۔
انہوں نے مزید بتایا کہ وہ اپنی نئی ایکشن فلم کے لیے سخت تربیت حاصل کر رہی ہیں اور میڈیا نے شاید اسی دوران ہونے والی ملاقاتوں کو رومانس سمجھ لیا۔
اداکارہ کے مطابق وہ اور ٹام کروز ایک مضبوط اور باعزت پیشہ ورانہ تعلق رکھتے ہیں۔ دونوں فنکاروں نے افواہوں پر کوئی منفی ردِعمل نہیں دیا بلکہ معاملے کو تحمل اور وقار کے ساتھ سنبھالا۔
واضح رہے کہ ٹام کروز اپنی مقبول فلم سیریز مشن امپاسبل میں مسلسل کامیابیاں سمیٹ رہے ہیں جبکہ آنا دی آرماس فلموں بلونڈ اور نو ٹائم ٹو ڈائی سے عالمی شہرت حاصل کر چکی ہیں۔یہ تمام افواہیں دراصل ایک غلط فہمی کا نتیجہ ثابت ہوئیں نہ کہ کسی ناکام رشتے کی کہانی۔
