گوگل نیوز پر ہمیں فالو کریںگھوٹکی: پاکستان پیپلز پارٹی کے رہنما اور سابق رکن صوبائی اسمبلی سردار شہریار شر، ان کے بیٹے جہانگیر شر اور دیگر افراد کے خلاف ایک لڑکی کے اغوا کے الزام میں مقدمہ درج کر لیا گیا ہے۔
پولیس کے مطابق یہ مقدمہ سپریم کورٹ کے وکیل عبیداللہ گھوٹو کی درخواست پر درج کیا گیا جنہوں نے الزام عائد کیا کہ ان کی بیٹی ارم کو کئی روز سے ہراساں کیا جا رہا تھا اور بعد ازاں گھر سے اغوا کر لیا گیا۔
مقدمہ اے سیکشن تھانے میں درج کیا گیا ہے جس میں وکلاء کے تحفظ سے متعلق دفعات بھی شامل کی گئی ہیں۔
عبیداللہ گھوٹو نے ایف آئی آر میں مؤقف اختیار کیا کہ شہریار شر، جہانگیر شر، امتیاز شر اور دیگر افراد ان کی بیٹی کے اغوا میں ملوث ہیں۔ دوسری جانب شہریار شر نے ان الزامات کو مسترد کرتے ہوئے واقعے کی مذمت کی اور کہا کہ ان کا کسی مجرمانہ سرگرمی سے کوئی تعلق نہیں۔
ادھر سوشل میڈیا پر ایک ویڈیو وائرل ہوئی ہے جس میں ایک لڑکی خود کو ارم بتاتے ہوئے دعویٰ کرتی ہے کہ اس نے امتیاز شر سے اپنی مرضی سے شادی کی ہے اور پولیس سے تحفظ کی درخواست کی ہے۔
یہ امر قابلِ ذکر ہے کہ عبیداللہ گھوٹو وہی وکیل ہیں جو پیپلز پارٹی کے رکن اسمبلی جام مہتاب حسین پر حملے کے مقدمے میں وکالت کر رہے ہیں۔
اس سے قبل 19 مارچ 2025 کو شہریار شر، ان کے بیٹے جہانگیر شر اور دیگر آٹھ ملزمان کے خلاف 16 مارچ کے روز جام مہتاب حسین پر ہونے والے مسلح حملے کے الزام میں مقدمہ درج کیا گیا تھا۔ اس واقعے میں دھار محفوظ رہے تھے تاہم ان کا ایک محافظ جاں بحق اور تین افراد زخمی ہوئے تھے۔
