گوگل نیوز پر ہمیں فالو کریںبھارتی فلم انڈسٹری کی معروف شخصیت اور سینئر اداکار سنجے خان کی اہلیہ، سابق ماڈل و اداکارہ زرین خان جمعہ 7 نومبر 2025 کو 81 سال کی عمر میں ممبئی میں انتقال کر گئیں۔
ان کے اہل خانہ کے مطابق زرین خان طویل عرصے سے عمر رسیدگی اور دل کے عارضے میں مبتلا تھیں اور انہوں نے اپنے گھر پر پُرسکون انداز میں جان جانِ آفریں کے سپرد کی۔
زرین خان کے انتقال کی خبر سامنے آتے ہی بالی ووڈ کی دنیا سوگوار ہو گئی۔ شوبز شخصیات، مداحوں اور دوستوں نے سوشل میڈیا پر گہرے دکھ اور تعزیت کا اظہار کیا۔ ان کے اہلِ خانہ نے بتایا کہ تدفین ممبئی میں ہی انجام دی جائے گی۔
زرین خان ایک باوقار اور باصلاحیت خاتون کے طور پر جانی جاتی تھیں۔ وہ ماضی میں اداکارہ اور ماڈل رہ چکی تھیں اور بعدازاں ایک کامیاب انٹیریئر ڈیزائنر اور مصنفہ کے طور پر بھی پہچانی گئیں۔
انہوں نے 1960 کی دہائی میں چند یادگار فلموں میں اداکاری کی، جن میں 1963 کی کلاسک فلم تیرے گھر کے سامنے میں دیو آنند کی سیکریٹری جینی فرنینڈز کا کردار ان کی پہچان بنا۔ اس کے علاوہ انہوں نے ایک پھول دو مالی جیسی فلم میں بھی کام کیا۔
زرین خان کی ذاتی زندگی بھی ایک دلچسپ کہانی ہے۔ ان کی ملاقات مشہور اداکار و ہدایت کار سنجے خان سے ایک بس اسٹاپ پر ہوئی تھی، جہاں سے دونوں کے درمیان محبت کا آغاز ہوا۔
بعد ازاں انہوں نے 1966 میں شادی کی۔ ان کے چار بچے ہیں سوزین خان (جنہوں نے بالی ووڈ اسٹار ہریتھک روشن سے شادی کی تھی)، زیورات کی ڈیزائنر فرح خان علی، بزنس وومن سیمون ارورہ اور اداکار زید خان۔
زرین خان نے فلمی دنیا سے کنارہ کشی اختیار کر کے اپنی فیملی اور تخلیقی کاموں کو زندگی کا محور بنایا۔
وہ نہ صرف اپنی شخصیت، بلکہ اپنی شائستگی اور فنکارانہ ذوق کے باعث بھی انڈسٹری میں احترام کی نگاہ سے دیکھی جاتی تھیں۔ ان کے جانے سے بھارتی فلم نگری ایک باوقار خاتونِ فن سے محروم ہو گئی ہے۔
