ڈیٹا چوری، ہیکنگ سے محفوظ، انٹرنیٹ سے آزاد، پاکستان نے اپنا موبائل فون تیار کرلیا، جانئے پوری معلومات

پاکستان نے مکمل طور پر محفوظ موبائل فون تیار کر لیا ہے جو خاص طور پر سرکاری اہلکاروں کے لیے ڈیزائن کیا گیا ہے۔

یہ ڈیوائس نیشنل ٹیلی کمیونیکیشن کارپوریشن (این ٹی سی) کے پائلٹ پروجیکٹ کے تحت تیار کی گئی ہے، جس کا ہارڈویئر اور سافٹ ویئر دونوں ملک کے اندر ہی بنائے گئے ہیں۔

این ٹی سی حکام کے مطابق یہ محفوظ ہینڈ سیٹ ایک خاص طور پر تیار شدہ آپریٹنگ سسٹم پر کام کرتا ہے جو انٹرنیٹ سے منسلک نہیں ہوتا، جس سے سائبر حملوں کا خطرہ بہت حد تک کم ہو جاتا ہے۔ فون پر تمام ایپلی کیشنز مقامی طور پر تیار کی گئی ہیں اور یہ ڈیوائس پاکستان کے کسی بھی ٹیلی کام آپریٹر کے سم کارڈز کو سپورٹ کرتی ہے۔

این ٹی سی کے مطابق اس فون میں کوئی بیک اپ فیچر موجود نہیں، جس کی وجہ سے چوری یا کسی بھی قسم کی سیکیورٹی خلاف ورزی کی صورت میں ڈیٹا نکالنا ناممکن ہے۔ انہوں نے مزید کہا کہ اس ڈیوائس کے ذریعے رابطے کو نہ تو مانیٹر کیا جا سکتا ہے اور نہ ہی انٹرسیپٹ کیا جا سکتا ہے، جس سے سرکاری اہلکاروں کے حساس رابطے مکمل طور پر محفوظ رہتے ہیں۔