گوگل نیوز پر ہمیں فالو کریںجرمنی نے پاکستان کے ہنر مند افراد کے لیے اپورچونٹی کارڈ اسکیم متعارف کرائی ہے جو بغیر پیشگی ورک ویزا کے یورپی ملک میں محفوظ اور باعزت روزگار یا خود روزگار کے مواقع فراہم کرتی ہے۔
یہ کارڈ ان افراد کے لیے بنایا گیا ہے جو جرمنی میں نوکری کے مواقع تلاش کرنا چاہتے ہیں لیکن درخواست کے وقت ان کے پاس کوئی باقاعدہ نوکری کی پیشکش موجود نہیں ہوتی۔
یہ پروگرام جرمنی کی مہارت کی کمی کو پورا کرنے اور عالمی سطح سے باصلاحیت پیشہ ور افراد کو راغب کرنے کی کوشش کا حصہ ہے۔
اپورچونٹی کارڈ کیسے کام کرتا ہے؟
اپورچونٹی کارڈ رکھنے والے پاکستانی شہری ایک سال تک جرمنی میں داخل ہو کر کام تلاش کر سکتے ہیں۔ اس دوران وہ کل وقتی یا جز وقتی نوکری کر سکتے ہیں اور ہفتے میں 20 گھنٹے تک ضمنی روزگار میں بھی مصروف رہ سکتے ہیں۔
علاوہ ازیں، امیدوار دو ہفتے تک ممکنہ آجر کے ساتھ ٹرائل میں بھی حصہ لے سکتے ہیں۔
درخواست دینے کے لیے شرائط
کارڈ کے لیے درخواست دینے کے لیے امیدوار کو مخصوص اہلیت کے معیار پر پورا اترنا ضروری ہے۔ روایتی ورک ویزا کے برعکس، اس کے لیے نوکری کی پیشکش ضروری نہیں۔ تاہم، امیدوار کو اپنے تعلیمی معیار اور زبان کی مہارت ثابت کرنا ہوگی۔
درخواست کہاں جمع کرائیں؟
درخواست آن لائن وفاقی دفتر خارجہ کے قونصلر سروسز پورٹل کے ذریعے جمع کروائی جا سکتی ہے۔
اہلیت کے لیے پوائنٹس سسٹم
اپورچونٹی کارڈ پوائنٹس کے نظام پر مبنی ہے اور کم از کم چھ پوائنٹس حاصل کرنا ضروری ہے۔
تعلیمی معیار کا موازنہ،اگر پاکستانی تعلیمی قابلیت جرمنی کے معیار کے مطابق جزوی طور پر موزوں ہے تو چار پوائنٹس ملیں گے۔
مہارت کی کمی والے شعبے میں قابلیت: اگر آپ اعلی طلب والے شعبے میں تعلیم یافتہ ہیں تو ایک پوائنٹ ملے گا۔
پیشہ ورانہ تجربہ: پچھلے پانچ سال میں دو سال یا سات سال میں پانچ سال کے تجربے کے مطابق دو یا تین پوائنٹس دیے جائیں گے۔
زبان کی مہارت: اے ون سے اوپر جرمن زبان کی مہارت پر پوائنٹس ملیں گے، بی ون پر دو اور بی ٹو یا اس سے اوپر تین پوائنٹس۔ سی ون انگریزی یا مادری زبان ہونے پر اضافی پوائنٹس ملیں گے۔
عمر اور جرمنی میں سابقہ قیام: 35 سال سے کم عمر کے امیدوار دو پوائنٹس حاصل کریں گے، اور سابقہ قیام پر ایک پوائنٹ۔
مالی شرائط
امیدوار کو جرمنی میں قیام کے دوران رہائش اور اخراجات پورے کرنے کی صلاحیت ثابت کرنی ہوگی، جس کے لیے بلاک شدہ بینک اکاؤنٹ میں کم از کم ماہانہ 1091 یورو یا کسی مالی وعدے کی دستاویز پیش کی جا سکتی ہے۔
