گوگل نیوز پر ہمیں فالو کریںپنجاب کے شہر جہلم میں معروف اسلامی اسکالر اور ماہرِ تعلیم انجینئر محمد علی مرزا کی اکیڈمی پر مسلح حملے کی کوشش کو پولیس نے بروقت کارروائی کرتے ہوئے ناکام بنا دیا جبکہ جوابی فائرنگ کے دوران ایک حملہ آور موقع پر ہی مارا گیا۔
پولیس حکام کے مطابق تقریباً صبح 10:45 بجے دو مسلح افراد نے اکیڈمی کے احاطے کو نشانہ بنایا۔ ایک حملہ آور نے سڑک کے مخالف جانب موجود گرین بیلٹ پر پوزیشن سنبھال رکھی تھی جہاں سے اس نے اکیڈمی کے مرکزی دروازے اور وہاں موجود پولیس اہلکاروں پر فائرنگ شروع کر دی۔
جہلم میں انجئینر محمد علی مرزا کی اکیڈمی پر فائرنگ،،پولیس کی جوابی فائرنگ سے حملہ آور ہلاک جبکہ پولیس ملازم زخمی ہوگیا۔پولیس کا کہنا ہے مسلح حملہ آور کو روکنے کی کوشش کی تو اس نے فائرنگ شروع کر دی۔ pic.twitter.com/0VO0nUTbob
— Latif Shah (@LatifShah27163) April 19, 2026
قانون نافذ کرنے والے اداروں نے فوری طور پر حملہ آور کو روکنے کی کوشش کی تاہم اس نے مزاحمت کرتے ہوئے پولیس پر بھی فائرنگ کر دی جس کے نتیجے میں ایک پولیس اہلکار زخمی ہو گیا۔ زخمی اہلکار نے بہادری کا مظاہرہ کرتے ہوئے جوابی کارروائی کی اور اسے فوری طور پر قریبی اسپتال منتقل کیا گیا جہاں اس کا علاج جاری ہے جبکہ اس کی حالت سے متعلق حتمی تفصیلات ابھی سامنے نہیں آئیں۔
پولیس کی بروقت موجودگی اور فوری ردعمل کے باعث حملہ آوروں کا منصوبہ ناکام بنا دیا گیا۔ فائرنگ کے تبادلے میں ایک حملہ آور موقع پر ہی ہلاک ہو گیا۔
واقعے کی مزید تفتیش جاری ہے جبکہ حکام حملہ آوروں کی شناخت، ان کے مقاصد اور ممکنہ روابط کا پتہ لگانے کی کوشش کر رہے ہیں۔ اس کے ساتھ دوسرے مبینہ حملہ آور کی تلاش بھی جاری ہے۔ حکام کا کہنا ہے کہ صورتحال کے حوالے سے مزید تفصیلات جلد سامنے لائی جائیں گی۔
