گوگل نیوز پر ہمیں فالو کریںپاکستان سے قبل از حج پروازوں کا آغاز ہو چکا ہے، اور ابتدائی مرحلے میں 1357 پاکستانی عازمینِ حج مدینہ منورہ پہنچ گئے۔عازمین کی آمد کے ساتھ حج آپریشن کا عملی سلسلہ باضابطہ طور پر شروع ہو گیا ہے۔ سعودی عرب پہنچنے پر ان کا خیرمقدم پاکستانی سفارتی عملے اور حج مشن کے ذمہ داران نے کیا، جس کے بعد انہیں رہائش کے لیے مسجد نبویؐ کے قریب واقع علاقے میں منتقل کر دیا گیا۔
مدینہ منورہ ایئرپورٹ پر پاکستانی حجاج کا استقبال سعودی عرب میں پاکستان کے سفیر احمد فاروق، قونصل جنرل سید مصطفیٰ ربانی اور ڈائریکٹر جنرل حج عبدالوهاب سومرو نے کیا۔ اس موقع پر حج انتظامیہ کے دیگر اعلیٰ افسران بھی موجود تھے جن میں مکہ کے ڈائریکٹر محمد عارف اسلم راؤ، مدینہ کے ڈائریکٹر زاہد سہیل، جبکہ مکہ اور مدینہ کے کوآرڈینیٹرز ذوالفقار خان اور کاشف حسین شامل تھے۔
تمام عازمین کو فوری طور پر مسجد نبویؐ کے قریب واقع مرکزی رہائشی علاقے ’مرکزیہ‘ میں منتقل کیا گیا، جو چند سو میٹر کے فاصلے پر ہے۔ اس سال سرکاری حج اسکیم کے تحت مجموعی طور پر ایک لاکھ 19 ہزار 210 عازمین کے لیے اسی علاقے میں مکمل رہائشی انتظامات پہلے سے مکمل کر لیے گئے ہیں۔
حکام کے مطابق عازمین کو آمد کے ساتھ ہی کسی تاخیر کے بغیر رہائش فراہم کی گئی، جبکہ انہیں وہیں پر نسک کارڈز بھی جاری کیے گئے جو حج عبادات اور مقدس مقامات تک رسائی کے لیے لازمی سمجھے جاتے ہیں۔ اس موقع پر مہمان نوازی کے طور پر ان کے لیے خصوصی استقبالیہ کھانے کا بھی اہتمام کیا گیا۔
رہائش اختیار کرنے کے بعد عازمین نے روضۂ رسولؐ پر حاضری کے لیے مسجد نبویؐ کا رخ کیا، جو مدینہ پہنچنے والے حجاج کی اولین روحانی ترجیحات میں شامل ہوتا ہے۔ وہاں انہوں نے عقیدت و احترام کے ساتھ حاضری دی اور روحانی سکون حاصل کیا۔
ایک عازم نے انتظامات پر اطمینان کا اظہار کرتے ہوئے کہا کہ پاکستان اور سعودی عرب دونوں نے بہترین سہولیات فراہم کی ہیں۔ حکام کا کہنا ہے کہ آئندہ دنوں میں مزید حج پروازیں بھی مدینہ منورہ پہنچتی رہیں گی، جس سے عازمین کی آمد کا سلسلہ مزید تیز ہو جائے گا۔
