کیا جنگ مکمل ختم ہونے جا رہی ہے؟ قطر نے غیرملکی پروازوں کیلئے اپنی فضائی حدود کھول دیں

قطر کی ایوی ایشن اتھارٹی نے اعلان کیا ہے کہ وہ مشرقِ وسطیٰ کی جنگ کے آغاز کے بعد پہلی بار غیر ملکی ایئرلائنز کی پروازوں کو اپنے مرکزی ہوائی اڈے پر لینڈ کرنے کی اجازت دے گی۔

ادارے نے ایک بیان میں کہا کہ قطر سول ایوی ایشن اتھارٹی نے ایک نوٹس ٹو ایئر مین جاری کیا ہے جس کے تحت ریاست قطر میں غیر ملکی ایئرلائنز کے لیے حماد انٹرنیشنل ایئرپورٹ کے ذریعے مرحلہ وار آپریشنز کی بحالی کا اعلان کیا گیا ہے۔

8 اپریل کو واشنگٹن اور تہران نے جنگ بندی کا دو ہفتوں پر مشتمل اعلان کیا تھا، جو 28 فروری کو امریکا اور اسرائیل کے ایران پر حملوں کے بعد شروع ہونے والی جنگ کے تناظر میں سامنے آیا۔

قطر نے ایران کی جانب سے خلیجی ممالک پر ڈرون اور میزائل حملوں کے ردعمل کے باعث اپنی فضائی حدود بند کر دی تھی، اور 7 مارچ کو جزوی طور پر اسے محدود پروازوں کے لیے کھولا تھا، تاہم یہ سہولت صرف قومی ایئرلائن قطر ایئرویز تک محدود تھی۔

قطری ایوی ایشن اتھارٹی کے مطابق غیر ملکی ایئرلائنز کے لیے فضائی حدود کھولنے کا فیصلہ “صورتحال کا جامع جائزہ لینے کے بعد” کیا گیا ہے، اور اس بات پر زور دیا گیا ہے کہ “تمام افراد کی حفاظت اور سلامتی اولین ترجیح ہے۔”