کراچی میں ٹھنڈا ٹھار لمکا پینے کیلئے 3 بہترین مقامات

کراچی میں سخت گرمی میں ٹھنڈا ٹھار لیمن لمکا، ملک سوڈا ،بلیو بیری ،پائن ایپل ،کریم لمکا سوڈااور کئی فلیورز میں ٹھنڈا ٹھار لمکا گرمی کی شدت کو کم کرنے کے ساتھ ساتھ آپ کو فرحت کا احساس دلاتا ہے، کراچی میں بیشمار پوائنٹس پر شہری شوق سے لمکا سے لطف اندوز ہوتے ہیں۔ ایم ایم نیوز نے کراچی میں لمکا کے 3 مشہور مقامات کا دورہ کیا جس کا احوال پیش خدمت ہے۔

برف پانی لمکا

گلستان جوہر میں واقع برف پانی لمکا پر شہریوں کو نت نئے فلیورزمیں لمکا پیش کیا جاتا ہے، برف پانی لمکا کے مالک کا کہنا ہے کہ ہم نے کراچی میں کریلہ فلیور متعارف کروایا ہے۔

انہوں نے بتایا کہ بھارت میں اس کو پانی کے ساتھ بنایا جاتا ہے لیکن ہم سوڈا شامل کرکے کسٹمرز کو پیش کرتے ہیں اس میں بھی تین فلیورز ہیں ،ان کا کہنا ہے کہ شہریوں کے مختلف خیالات ہوتے ہیں کسی کو کم مرچ چاہیے، کسی کو زیادہ تیکھا ذائقہ پسند ہے۔

اس کے علاوہ ہم نے کالا کھٹا فلیور متعارف کروایا ہے اور یہ دونوں فلیورز ہمارے علاوہ کراچی میں کہیں بھی نہیں ہیں۔ہمارے پاس بلیو بیری، لیمن اور لیمنٹ بہت زیادہ پسند کیا جاتا ہے۔

ان کا کہنا ہے کہ لمکا پینے والے اس کے بغیر نہیں رہ سکتے اور ہماری کوشش ہے کہ اپنے کسٹمرز کو نئے نئے فلیورز پیش کرتے رہیں۔یہاں 70 روپے سے لیکر 150 روپے تک فی گلاس کسٹمرز کو پیش کیا جاتا ہے اور شہری دور دور سے لمکا پینے یہاں آتے ہیں۔

اسپیشل ہانڈی لمکا

کھارادر کے علاقے میں مشہور اسپیشل ہانڈی لمکاپر کسٹمرز کو گلاس کے بجائے ہانڈی میں لمکا پیش کیا جاتا ہے، یہاں پائن اپیل، لیچی اور اورنج کے علاوہ مختلف فلیورز موجود ہیں۔

اسپیشل ہانڈی لمکاکے عملے کا کہنا ہے کہ شہریوں کو پہلے بار ہانڈی میں لمکا پی کر شائد عجیب لگتا ہے لیکن ایک بار لمکا پینے والے دوسری بار ہمارے پاس ضرور آتے ہیں۔

ان کا کہنا ہے کہ ہمارا لمکا بنانے کا طریقہ دوسروں سے بالکل مختلف ہے۔ یہاں ڈسپوزیبل گلاس میں 80 روپے اور ہانڈی میں  120 روپے میں لمکا پیش کیا جاتا ہے۔

آئس موکس

ڈی ایچ اے کھڈہ مارکیٹ میں واقع آئس موکس لمکا کے فلیورز کے معاملے میں اپنی مثال آپ ہے، یہاں دھواں دھار لمکا پینے والوں کو ایک منفرد ذائقہ فراہم کرتا ہے۔

آئس موکس کے عملے کا کہنا ہے کہ ہم مختلف ذائقوں میں لمکا تیارکرتے ہیں اور تقریبات کیلئے بھی مختلف فلیورز کی ڈیمانڈ کی جاتی ہے۔یہاں اسموکی لمکا80 روپے میں شہریوں کی خدمت میں پیش کیا جاتا ہے۔