سنجے دت کینسر کے مرض کو شکست دینے میں کامیاب ہوگئے

ممبئی: بالی ووڈکے مشور زمانہ اداکار سنجے دت نے کینسر کو شکست دے دی جس کی تصدیق انہوں نے خود اپنے انسٹاگرام اکاؤنٹ پر کردی ہے۔

سنجے دت نے یہ خبر اپنے بچوں کی سالگرہ کے موقع پر شیئر کرتے ہوئے کہا ”پچھلے کچھ ہفتے میرے اور میرے گھر والوں کے لیے بہت مشکل رہے۔ لیکن جیسا کہتے ہیں نا کہ خدا سب سے مشکل جنگ اپنے سب سے بہادر سپاہی کو ہی دیتا ہے۔

My heart is filled with gratitude as I share this news with all of you today. Thank you ???????? pic.twitter.com/81sGvWWpoe

— Sanjay Dutt (@duttsanjay) October 21, 2020

انہوں نے کہا کہ آج میرے بچوں کی سالگرہ کے موقع پر میں بہت خوش ہوں کہ میں اس لڑائی سے فاتح ہوکر لوٹا ہوں اور انہیں بہترین تحفہ دینے کے قابل ہواہوں، جو میں دے سکتا ہوں، صحت اور اپنے خاندان کی فلاح۔

سنجے دت نے اپنے مداحوں سے مخاطب ہوتے ہوئے کہا کہ یہ سب آپ کے غیر متزلزل یقین اور تعاون کے بغیر ممکن نہیں تھا۔ میں اپنی فیملی، دوستوں اور ان تمام مداحوں کا شکر گزار ہوں جو میرے ساتھ کھڑے رہے اور اس مشکل وقت میں میری طاقت بنے۔ آپ سب کی محبت، احسان اور بے شمار دعاؤں کا بے حد شکریہ، جو آپ نے میرے لیے بھیجیں۔

مایا ناز اداکار سنجے دت نے اپنی ڈاکٹر، ان کی ٹیم، نرسز اور ممبئی کے کوکیلا بین اسپتال کے میڈیکل اسٹاف کا بھی شکریہ ادا کیا اور کہا کہ ان تمام لوگوں نے پچھلے کچھ ہفتوں میں میرا بے حد خیال رکھا۔ اس خوبصورت پیغام کے ساتھ سنجے دت نے کہا یہ خبر آپ سب کے ساتھ شیئر کرتے ہوئے میرا دل تشکر کے ساتھ بھر گیا ہے، شکریہ۔“

واضح رہے کہ سنجے دت کو رواں سال اگست میں اسٹیج 4 کے پھیپھڑوں کے کینسر کی تشخیص ہوئی تھی لیکن انہوں نے اپنی بیماری سے متعلق لوگوں کو کچھ بھی نہیں بتایاتھا۔ تقریباً ایک ہفتے قبل سنجے دت نے کینسر سے متعلق پہلی بار بات کرتے ہوئے کہا تھا میری زندگی میں نئے زخم نے انٹری دی ہے جسے میں جلد ہی شکست دے دوں گا۔